“Ua tele so‘u iloa i isi auala e faasaoina ai se pepe pe a fanau”..tausi soifua
O le au malaga o fomai ma faatosaga mai Ausetalia sa latou faatinoina se aoaoga i le falemai autū i Motootua e faapitoa lava lea i fomai ma tausi soifua o loo avea ma faatosaga ina ia mafai ona tufa atu i ai isi tomai faafomai faaonapo nei.
O se auala tāua lea e maua ai pea le tomai e faatino ai togafitiga e faasino i le faafanauina o tina ma‘itaga.
“O le tāua ia te au o le aoaoga ona e iai isi togafitiga ua mafai ona ou iloa ai”. O le vasega o fomai mai Ausetalia sa patino le latou aoaoga i le faia o togafitiga mo tina o le a fananau ae e tulai mai ai ni faaletonu e manaomia ai ni togafitiga faapolofesa e faia e tausi soifua ma foma’i.
Faaalia e se tasi o fomai sa auai ile a’oa’oga o nisi o vaega e masani ona tula’i mai pe a fanau se tina e masani ona faatino se ta’otoga faanatinati e faasaoina ai le tina ma le pepe fou, ae o le tomai o fomai mai Ausetalia ua ia iloa ai isi auala e mafai ona faatino ai le galuega e aunoa ma le tau faia o se taotoga.
Ua lē manao le fomai e faailoa o ia ona o mafuaaga tāua. Ua faaalia e le pule sili lagolago o le auaunaga faatausi soifua i le Matagaluega o le soifua maloloina le faletua o Polofesa Pelenatete Stowers, e maualuga lona talitonuga ua tāua le aoaoga mo fomai ma tausi soifua faatosaga, ae tāua foi mo tina e auina atu e fananau pe a oo ina ma‘itaga.
Ua ia faaalia foi le tāua tele o le aoaoga mo tausi soifua ma fomai o loo galulue i Savaii ma isi falemai faaitumalo i le atunuu.
E toafitu fomai ma tausi soifua e to‘a sefuluiva sa auai i le aoaoga ua faaiuina. Faaalia e se tausi soifua sinia i le maota gasegase o Tupua Tamasese Meaole, o Asenati Tuilaepa o le aoaoga ua matuā tāua tele mo ia i le taimi e tulai mai ai se tulaga faaletonu i le faafanauina o se tina ma‘itaga.
O le vaega e ta’ua o le Advanced Life Support in Obsterics mo atunuu Asia ma le Pasefika sa lagolago i le faia o le aoaoga. O se tasi o polofesa mai le falemai o le Royal Hospital for women i Ausetalia o Andrew Bisits sa aofia ia i latou na feagai ma le faia o le aoaoga ma na ia faaalia o aoaoga faapea o loo latou faafoeina foi i Ausetalia.
O le toagaogao o le au faigaluega i fomai ma tausi soifua i le matagaluega o le soifua maloloina ua iai le talitonuga o i latou na faia le aoaoga e matuā tele ai le iai o le silafia e faia ai togafitiga mo taimi o faalavelave e lē iloa e ono tutupu pe a oo ina faafanau se tina ma se tamaitai.
