O se saunoaga lea a le alii Palemia, le Susuga Tuilaepa Lupesoliai Sailele Malielegaoi i le faalauiloaina aloaia o le Ripoti lona lua o fuainumera mo le Tusigaigoa o le 2011/12.
Faaalia e le alii Palemia, o le faavae mautu lea o soo se fuafuaga faataatia a le Malo ma Pisinisi Tumaoti, aemaise i le soifua ma le ola o aiga i aso taitasi.
“E tatau i le mamalu lautele o le atunuu, aoga, tagata suesue, o i latou o loo fausia taiala ma faiga faavae faapea soo se tagata o loo tuufaatasia faamaumauga, ina ia faatāua ma faaaogā faamaumauga aoina ua tuufaatasia i le Tusigaigoa 2011, ina ia mafai ai ona siitia le soifua lautele o tagata Samoa,” o se saunoaga lea a le Susuga Tuilaepa.
E tusa ai ma le ripoti ua tuufaatasia mo le Tusigaigoa 2011, e to‘a 187,820 le faitau aofai o tagata o loo nonofo i Samoa nei, ma e 7,000 ua siitia ai pe a faatusa i le Tusigaigoa o le 2006.
E ui o loo siitia le faitau aofai, ae e talitonu le Ofisa o Fuainumera Faamauina, o le femalagaai pea o tagata i atunuu i fafo, o loo tuuitiitia ai lea siitaga.
O se tulaga e lelei leaga e pei ona ta‘ua e nisi ae o le isi tulaga ua vaaia nei le maoae o le siitia – ua matuā toatele lava le fanau laiti ae e foliga mai ua iai se pa‘ū i le numera o le tupulaga talavou lea lava sa tele ina faamauina i tausaga ua mavae le numera silia i le faitau aofai o tagatānuu o Samoa.
Atonu o le toatele o le tupulaga lea ua faapea foi ona maua avanoa e aooga ai i fafo aemaise o galuega faavaitaimi ia e agai ai i Niu Sila faapea ai ma Ausetalia toe foi mai ai.
O le 40 pasene o le faitau aofai o lo tatou atunuu ua iai i le taimi nei, o fanau i le va o le 0-14 tausaga, 20 pasene o le tupulaga talavou i le va o le 15-24 tausaga le matutua ma le 40 pasene o tagata matutua. Ta‘ua e le alii Palemia, o faailoilo faavae o fuainumera o le tamaoaiga, siosiomaga, soifua maloloina, avanoa faigaluega, fesootaiga ma isi faamatalaga tāua, o loo tomatau ai i soo se atinae a le tatou Malo aemaise i vaega taitasi.
O le faalauiloaina o le Tusigaigoa 2011 sa faapea foi ona tatala aloaia ai ma le upega tafailagi ua mae‘a tapena mo le faalauiloaina o fuainumera faamauina o le atunuu ma ua mautinoa ai le lelei faalauiloa o soo se faamaumauga ma faailoilo tau fuainumera e mafai ona tuufaatasia e le Ofisa o Fuainumera faapea vaega o le atunuu o loo gafa ma le itu tau atinae. E le gata mo Samoa a o le lalolagi atoa foi i faamatalaga e manaomia i faamaumauga ua mafai ona tuufaatasia.
O le galuega o le tusigaigoa o le 2011, sa galulue faatasi ai le Ofisa o Fuainumera Faamauina ma le Matagaluega o Aoga, e ala i le faaaogāina o faiaoga ma asiasi aoga e faatino le tuufaatasia o le aofai o tagata lautele.
Sa faatautaia lea galuega i le masina o Novema o le tausaga na tea nei i le lua vaiaso ma o ni masini faaneionapo poo scans, sa faaaogā ina ia vave mae‘a lea galuega ma faalauiloa ai loa i le masina o Tesema le faitauga muamua.
E silia ma le to‘a 1,000 tagata o loo faamanuiaina ma malaga i Niu Sila i le polokalame o le quota faatasi ai ma i latou o loo malaga atu mo galuega faavaitaimi, o le ala lea o le tuuitiitia o le fuainumera o le faitau aofai o lo tatou atunuu.
O se tulaga ua laga ai foi popolega o nisi o le atunuu aemaise le Vaega faaupufai o loo agaia le Malo le Tautua Samoa i taimi ua tuanai ona o le manatu o le toatele o se atunuu e agai i fafo ma faaitiitia ai le faitau aofai o ona tagata e iai vaega e lelei ai, e iai foi vaega e leaga ai, ma o le tulaga mautinoa ua vaaia i lenei tusigaigoa o le toatele o tagatānuu o Samoa ua o ese ma le atunuu e tau saili galuega ma avanoa e faaleleia ai aoaoga a fanau i atunuu mamao. Faaalia e le Tautua Samoa ina ua mae‘a le faitauga muamua – e manino le toatele e le o maua ni galuega i Samoa, ma o se tasi o mafuaaga tele o le agai i fafo o tagata o Samoa ma o se tamaoaiga sili o tagata o se atunuu e sau mai i ona tagata.
Faaalia e le tamaitai o Malaefono Tauā, le tamaitai pule lagolago o le vaega o Tusigaigoa ma Suesuega laiti o le Ofisa o Fuainumera Faamauina, e tusa o le 2 pasene o le atunuu e lei mafai ona faitauina ona o nisi o faafitauli laiti e pei o le lē maua atu i taimi o faamaumauga ma le lē tuuina mai o faamaumauga sa‘o o loo manaomia. O le Malo o Ausetalia sa faatupeina lea galuega tele i lalo o le polokalame fesoasoani a le AUSAID.
O le lagolagosua a le Malo o Ausetalia na toe faamamafa e le alii Hai Komesina o le Malo o Ausetalia i Samoa, o Dr Stephen Henningham i le tatala aloaia o lenei galuega tele ma na ia faaalia le tāua o lenei galuega e pei ona ta‘ua e le Palemia i fuafuaga faataatitia a Samoa auā le atinae o lona tamaoaiga, ma o le a faaauau lenei lagolago i tausaga o lumanai.
