Siitia auaunaga o suesuega a Leoleo

O le maua o se fesoasoani e faatotogaina ai le ofisa o suesuega a le Ofisa o Leoleo, o le a mafai ai nei ona vaaia le vave o sailiga o soligatulafono a le Matagaluega.

O le mau lea a lenei matagaluega ina ua tatala aloaia se vaega o suesuega ua iai uma masini computers ua iai polokalame e saili ai tulagalima o se soligatulafono.

O se faiga na ta‘ua e lē o loo faauluulu i ai suesuega faapitoa nei a le Matagaluega o Leoleo, o Tagaloa Tipasa Matamu, o le a mafai ai ona saili tulagalima e 40,000 i le aso nai i lo le tulaga lea e fai nei e na o le fā lava e mafai ona saili i le aso e Leoleo.

O lalo o se polokalame ua faatupe ai e le Ofisa o Leoleo a Ausetalia lea ua fausia ai ma faatotogaina se potu faapitoa ia ua iai uma ma masini moomia aua lenei faamoemoe o suesuega.

E lua ma le afa miliona tala Samoa le tau atoa o lenei galuega ma o se mitamitaga lea i le Matagaluega aua o le tele o mau faitino sa moomia vave mo Faamasinoga sa tele lava ina lafo i Niu Sila poo Ausetalia foi mo faamaoniga.

Na iai lea o se fesoasoani i le vaega o sueseuga a le Iunivesite o le Pasefika i Saute, i le itu lea tau i le faamaoniga o soo se vailaau poo se fualaau faasaina, ae o le itu lava ia i le sailiga o tulagalima sa faigata tele ona faatino i Samoa.

O se isi lea tupe faasao tele a le Matagaluega aua o lea ua mafai lava ona faatino i Samoa lenei galuega ma ua iai foi sui o le Ofisa o Leoleo a Ausetalia ua iai lea tomai faapitoa o suesuega ua faatino nei aoaoga mo sui o le Matagaluega o Leoleo i Samoa o loo nafa ma nei sailiga.

E toatolu lava sui o le Matagaluega o Leoleo a Samoa ua iai le tomai mo le faaaogāina o ia masini ma le faia o ia suesuega faapitoa, ae to‘a 27 sui o le Pasefika na malaga faapitoa mai i Samoa i le vaiaso na tea nei ma ua faaauau nei a‘oa‘oga i le sailiga o le tomai faapitoa lenei.

Ua avea foi le tatala o lenei potu o suesuega faapitoa i Samoa ma auala na faamautu mai e Tagaloa Tipasa, ua avea ai nei Samoa ma se nofoaga e agai mai iai suesuega faapea mai i Ofisa o Leoleo i totonu o atumotu o le Pasefika e le o maua lenei ituaiga auaunaga.

O loo aofia ai foi i ia masini fou, ni masini e suesue ai pulu o laau malosi (fana) ma nisi o aupega e faaaogā i soligatulafono.

E oo foi i laei o tagata ma soo se vaega o le tino o le tagata, e mafai ona faaaogā ia masini e sue ai mo le faamautuina o suesuega e faia e le Matagaluega o Leoleo