Ua toe agai le atunuu i le aoina ma le faatau atu o le popo auā le gaosia o le suauu popo lea ua maualuga foi le manaoga mai i fafo.
O le lipoti o le masina o Aukuso a le Faletupe Tutotonu oSamoa, ua faamauina ai e faaluaina lelei lava le popo na aoina mo le faatau atu i fafo pe a faatusatusa atu i le taimi lava lenei o le tausaga na tea nei.
Ua 90 pasene ua siitia ai le popo ua faatau atu i Samoa ma ua faaopoopo ai ma le $1.4 miliona tala i le tupe maua mai i lea fua o faatoaga mai i Samoa.
O uta o le suauu popo gaosi i Samoa nei i le masina lava lea o Aukuso na agai i Meleisia faapea ai Niu Sila. E tasi lava le kamupani i atunuu ia e lua na agai i ai lea oloa mai i Samoa.
Faaalia e le Pule o le Kamupani o le Suauu Popo a le Pasefika i Vaitele, le Afioga Samau Etuale Sefo, o le maualuga o le popo na mafai ona ao, ua vaaia ai nei le toe faalautele o fale e teu ai le popo mago i Nuu faapea ai le motu tele i Salafai.
Ua toe faatau mai foi e le Kamupani se isi masini mo le gaosiga o le suauu popo, ma o le tolu ai lea o masini tetele ua faatau mai mo lenei atina‘e.
O loo faapipii nei la le masini lona tolu lea ina ia tali atu i le popo ua mafai nei ona toe aoina.
Faaalia e le Afioga Samau o le tausaga lea na tea nei sa na o le 100 tone o le suauu popo na mafai ona gaosi e le latou kamupani i le vaiaso. O le taimi lenei ua faaluaina lea uta.
O le tele o tausaga talu ona toe agai Samoa i ona eleele auā oloa e auina atu i fafo ma ana atina‘e o le tamaoaiga, sa faigata ona toe faasufi faifaatoaga aemaise le aufaipopo ina ia toe agai e ao le popo mago ua lalau ona ua lē toe iai ni maketi i ia vaitaimi i atunuu mamao auā le faatau atu i ai o le popo.
Sa umi se taimi o tauanau le aufaipopo seia oo lava ina faatuina le kamupani fou lenei ma ua fesoasoani loa i le unaiga o faalauiloa aemaise o le siisii ai o le tau o le popo mago, ma amata ai loa ona toe vaaia le foi mai o tagata e toe faamago, fua ma faatau atu le popo mago.
Faaalia e Samau, atonu o lea ua talitonu le mamalu o le au faifaatoaga ua tele le maketi ua avanoa i lenei taimi mai i Niu Sila faapea ai Meleisia ma ua vaaia le faaauau o le avatu i fafo o lenei oloa, ua manatu ai e lē o pa‘ole le tauanau atu e toe ao ma faamago le popo.
E aogā tele foi le siisii pea o le tau o le popo e aoina, e pei ona saunoa i ai le afioga Samau.
Ua tele foi tausaga o feagai Samoa ma faigata i le taumafai ai e faatau atu le popo mago ma le suauu popo i fafo, ae o lea ua foliga mai ua sologa lelei foi i lenei vaitaimi lea atina‘e.
O le faamoemoe o le kamupani lenei ina ia alualu ai pea i ni tausaga se tele lenei atina‘e auā e mautinoa o le manaoga ua iai nei mai i fafo ua faatuputupulaia foi i lenei vaitau.
