O le tala lata mai i le numera o tagata ua faamauina le maua i le swine flu poo le siama o le H1N1 o lea ua oo atu i le toa 37 ua aafia. O suesuega na taunuu mai i Niu Sila i le vaiaso na tea nei lea na faamautu ai lenei aofai ae o loo iai le popolega e toatele lava ua aafia ma o loo faaauau ona lafo atu i Niu Sila suesuega o loo faatautaia i Samoa aua lava le sailia poo ai nisi ua toe aafia talu mai le vaiaso na tea nei.
O le ogatotonu o le vaiaso na tea nei lea na amata ai ona faatautaia siaki o soo se tasi o pesia i le flu masani i le taulaga o Apia i se maota i tua atu o le Ofisa o Tagata Tafafao Maimoa mai fafo i le Eleele Fou. O lea faiga na taua e le Ofisa Sili Lagolago o le Tautua Faafomai o Le Mamea Dr Limbo Fiu, ina ia tuu eseese ai lava i latou ua aafia i le flu ma maua ai auga o le H1N1 mai le oo atu i le Maota Gasegase o Tupua Tamasese Meaole i Motootua lea ua faaaoga mo isi gasegase tau savali ma gasegase taofia. O puipuiga lava na taua e Le Mamea ina ia mafai ai ona tuu eseese auaunaga nei ma vave ai ona faatino suesuega o le swine flu.
Faaalia e Dr Stanley Dean, le faauluuluga o le vaega o tautua faafomai a le Matagaluega o le Soifua Maloloina mai le vaiaso na tea nei ua maua ai ua faaopoopo le numera o tagata ua maua i le flu masani lea e oo atu lava i le toa 200 i latou e siaki i le aso ma o se mafuaaga lea ua aveese ai mai i Motootua o ia tagata ae ave sao lava i le eleele fou e suesue ai. Mo le mamalu o le atunuu o loo i nuu i tua ma le motu tele i Salafai, o loo ua fautuaina le agai ane i falemai faaitumalo aua le suesueina o i latou.
Faaalia e Dr Stanley Dean o loo iai uma togafitiga ma vailaau mo le flu masani faapea ai puipuiga mai i le swine flu i nofoaga e pei ona taua. Faaalia foi Dr Dean o le popolega lava ona o le toatele ua maua i nei gasegase ua pesia i le feoai ai a o loo maua i le flu ma o le lapataiga ua faaauau ina ia nonofo lelei i aiga pe afai ua aafia ma e tatau lava ona usitaia fautuaga ina ia faaitiitia ai le pepesi o lenei faamai.
O nuu i tua faapea ai le motu tele i Salafai, o loo toaitiiti i latou ua aafia i lenei faamai ma o le toatele ua pesia ona o tagata faigaluega o loo agai mai i le taulaga ma toe foi atu i aiga ia e ono pesia ai le gasegase i afioaga i tua.
O le taimi faatulagaina mo siaki i le eleele fou, ua amata mai i le 8 i le taeao seia oo atu i le afa o le fa (4.30) i le afiafi. E tatala le falemai tele i Motootua mai le lima (5pm) seia oo i le itula e sefulu (10pm) i le afiafi. O tua atu o le a leai se fomai e vaaia nisi e ono oo atu mo ni togafitiga o le flu masani. Faaalia e Le Mamea Dr Limbo Fiu, o loo taumafai e puipui tagata faigaluega a le matagaluega, fomai ma tausi soifua ona ua toatele foi le aufaigaluega ua faataotolia i le gasegase lava lenei o le common flu ona o loo feagai ma le mamalu o le atunuu i aso uma.
Ua fautuaina le atunuu ina ia taumafai lava e oo ane i le eleele fou talu ai o loo vaai fua ai soo se tasi e gasegase sei vagana ai fualaau o loo faatauina mai i le matagaluega.
Ua taofia foi auaunaga o siaki masani ia e faatautaia e le matagaluega i vaiaso taitasi ona o le moomia o tagata faigaluega uma a le Soifua Maloloina e fesoasoani i le auaunaga lenei ua faia i le elelele fou. O lona uiga o siaki o ponaivi, siaki o le gasegase o le suka, siaki o tina maitaga faapea siaki o le gasegase o le fatu ua taofia mo se taimi le tumau amata atu i le vaiaso lenei seia maea le pisi o le aufaigaluega i galuega mo le puipuiga ma togafitiga o i latou ua aafia i le swine flu ma soo se tasi ua aafia i isi gasegase faapea.
O aoga ua faamalosia foi le tutuli o fanau ua aafia i auga o lea gasegase e pei o le tale ma le tafe o le isu (sei tulou) ina ia malolo lelei seia malosi ona toe foi lea i le aoga.
Ua toatasi le tagata mai i le Pasefika ua faamauina le maliu i lenei gasegase ae o se tamaitai e 26 tausaga le matua mai i Tonga lea na faatopetope se taotoga i le faaiuga o le vaiaso na tea nei ina ia tuu eseeseina ai ma lana pepe fou ae maea lea taotoga ae maliu o ia i le amataga o le vaiaso na tea nei. O loo soifua pea le pepe fou ae ua aafia tele lenei tamaitai ma uma ai lava ma lona soifua.