O se tasi lenei o gaioiga fou ua vaaia i lo tatou atunuu ma e toalua ni alii ua molia ai i suesuega sa faatautaia e le Matagaluega o Leoleo.
O le alii o Chris Stehlin, 30 tausaga o Aleisa ma Faleasiu lea ua molia ai ae e lē o maua mai le igoa o le isi o loo toalua ai lea ua taofia uma i lalo o le vaaiga a Leoleo e tālia ai le aso e tulai ai i luma o le Faamasinoga.
E matautia foi lenei ituaiga solitulafono i atunuu e pei o Niu Sila, Ausetalia ma Amerika ma ua mautu lava i latou e faatinoina, mai i le augaoi taavale, ia i latou e agai i ai taavale ma faanatinati ai le suiga o laisene o taavale, o pepa e faaaogā auā le lesitalaina aemaise o le vali atoa ia sui foliga o taavale.
O ni gaioiga e mautinoa lava e toatele i latou e tutu faatasi auā le faatinoga ma e tele foi le tupe e lē taumate e alu ai i le taumafaiga e ave faagaoi le tele o taavale. Ua avea foi le tele o taavale i totonu o le atunuu ua matauina ai loa le sau o lenei ituaiga solitulafono i totonu o Samoa.
O taavale e lima na gaoia, e eseese uma tagata e ana ma e eseese uma foi aso na gaoia ai. O se faamatalaga o loo i totonu o le ripoti a le Matagaluega o Leoleo, ua iloa ai le gaoia mai o ia taavale ma ave i fale inisinia ma fesuiai ai loa totoga o ia taavale. O nisi o ia taavale sa fesuiai totoga ma toe faatau atu e i laua ua molia ma ua toe maua uma i suesuega.
O se tasi o van, sa gaoia mai i le aso 31 o le masina o Me o le tausaga nei, o le vaitaimi tonu lea o le faamanatu ai o le 50 tausaga o le Tutoatasi o lo tatou atunuu, ma sa gaoia mai i tua o le falekalapu a le RSA i le nofoaga sa tu ai.
O le isi van lanu meamata, e faapea se faamatalaga, sa tu i se nofoaga mo taavale i Saleufi, ae peitai na gaoia mai ai lava. E faapea foi se faamatalaga, o le isi tamai taavale ua toe maua nei, sa gaoia ma ua fesuiai totoga ma totoga o se isi taavale ae faaaogā o se taavale la‘upasese.
O le popolega ua iai mo ia taavale sa gaoia, o le tele o mea ua faaleagaina ona o fesuiaiga na faia i ai. Saunoa le Sui Sooupu o le Matagaluega o Leoleo, Leaupepe Fatu Pula, o loo masalomia nisi o taavale ua ave ma fai i ai lea tulaga ma o loo faaauau pea i ai suesuega a le Matagaluega.
O le alii o Chris, o se tagata ua tele tausaga o aumau i Niu Sila ma o loo masalomia le masani i lea faiga ua ia faatino ai le solitulafono i totonu o Samoa.
O se taimi muamua lea ua tulai mai ai lea soligatulafono o le gaoia o taavale ma fesuiai totoga i totonu o le atunuu ma e fautuaina ai e le Matagaluega o Leoleo le mamalu o le atunuu ina ia tagatagai i le saogalemu o ia meatotino ona o lea ua tupu i totonu o Samoa ia gaioiga.
