O se faasilasilaga lea mai i se lipoti a le lala o Malo Aufaatasi o loo nafa ma fesoasoani i atina‘e, le UNDP lea e iai lona ofisa i Matautu.
O le faamaumauga lenei na maua ina ua mae‘a ona taamilo i Samoa lenei aufaigaluega ma taumafai ai e saili le tulaga tonu lava o iai aiga ma le latou faasoa aemaise o le tupe maua ma le faasoaga o lea seleni.
O le vaega muamua lava lenei na lāgā i le fonotaga a le UNDP ma sui o Faalapotopotoga Tumaoti ma Pisinisi i Samoa i lenei vaiaso.
O le 4% lea e pei ona ta‘ua ua siitia ai le soifua lē tagolima o Samoa ma e faaopoopo i le tulaga sa iai i le tausaga na tea nei.
E lē o toe po se lilo i le tele o aiga o loo vaaia pea le tāpā o se fesoasoani mai i le lautele o Samoa ona ua lē tagolima.
Ua iai foi taumafaiga a nuu ina ia mafai ai ona saili tagata lava ia i o latou fanua ma eleele mo le totoina ina ia tuuitiitia ai le ola mativa, peitai o loo vaaia pea le agai i luga o le numera o aiga ua lē mafai ona fafaga fanau ma mātua ona o le leai o se tupe maua.
O le tulaga foi o le mativa lea o loo ta‘ua i lenei suesuega ua taulai i le tupe maua e faatino ai le tausiga o aiga.
O le mafuaaga lea o le finau pea o le Malo e lē moni nei lipoti, ae o le faamatalaga a lea suesuega ua tele aiga ua lē mafai ona fai le tausiga masani lea e ala i seleni e tausi ai fanau ma aiga.
O le popolega la lea ua agai nei i ai Malo Aufaatasi, ina ia saili tonu le mafuaaga o le iai pea o lea numera i faamaumauga faatatau ia Samoa.
O le toatele o aiga o loo aofia i lenei suesuega ua aofia ai i latou e leai nisi o maua galuega totogi ta‘i vaiaso pe ta‘i lua vaiaso foi. Ua lē galulue ulugalii, leai ma se tupe e faatino ai manaoga faatauvaa e tatau ona maua.
O le faamatalaga a le Ofisa o Fuainumera Faamaumauina lea na faalauiloa i le tausaga na tea nei, lea na faapea mai ai o loo sili atu i le ‘afa o le faitau aofai o Samoa o tagata e tatau ona galulue, e lē o maua ni totogi ta‘i vaiaso ma ta‘i lua vaiaso ma o le toatele lenei ua faaigoaina o i latou e lē o faigaluega.
O le finauga a le Malo o le toatele o i latou nei o loo galulue o faifaiva, o fai faatoaga ma o nisi ua iai lava galuega lē tumau ae o loo maua ai seleni mo aiga.
O le lipoti lenei o loo vaai i le totogi masani lava ia e tatau ona maua ma o le iuga la lea.
Ua siitia le mativa e mafua mai ua lē tagolima nisi i galuega ma le seleni e tatau ona maua mai ai.
Ua iai foi galuega fesoasoani e pei o avanoa e galulue ai faavaitaimi i Niu Sila, ua iai foi taumafaiga a le Matagaluega o Tina ma Tamaitai i le itu o Tupulaga ina ia saili ai i totonu lava o nuu i faalapotopotoga a tupulaga ni atina‘e e maua ai galuega a fanau talavou, ma le taumafaiga lea i le itu tau i a‘oa‘oga e ofo atu ua faalautele i le faakamuta, le faieletise, le palama, a‘oa‘oga ina ia mafai ona iai ni tomai eseese auā tupulaga o le atunuu e maua ai galuega.
O le mau a le tele o taitai Samoa – e fia ‘ai le Samoa ona o le lē galue, ae o le fesili tele la, afai e lē galue, leai se galuega e faatino ina ia tafi esea ai le fia ‘ai, o fea ua agai i ai aiga nei o le a lē maua le manaoga faatauvaa lava e tatau ona maua? Fai mai Malo Aufaatasi, o le a faamalosia ana foi polokalame ina ia mafai ai ona saili se tali i nei faafitauli.
