Au malosi a le Malaka 2 siamupini o le Teuila 2019 ma lana ua tapauai

Na iloga le malu o le tuaa a le au lona lua a le Malaka i le laua sailiga siamupini ma le au a le Maata i le taamilosaga a le Teuila i le aso Toonai ua mavae i Otara. Na tata muamua le au a le Malaka 2 o loo kapeteni ai le susuga ia Agafili Elia ma latou mauaina ai e 70 i polo e 74. Ona tuliina lea e le au a le Maata, o se tasi o au ua leva i totonu o le taamilosaga ma o se au malosi foi, sa siamupini i le Teuila i le tausaga ua mavae, na maea lelei a latou pe e le i maua a’i ma faamaea ai loa ma le taaloga. O le vaega na sili ona mataina ai le taaloga o le sailiga siamupini, o le malu lelei o le tuaa a le Malaka, e lei iai se tasi na faaletonu i totonu o le malae, o le fesoasoani sili lea sa faamama avega i faatea ma le kapeteni.

O le susuga ia Agafili Elia o se tasi o tamalii ua iloga i le taaloga o le kirikiti o ia foi o le kapeteni o le au malosi a le Malaka i le tamailosaga o le Pimka ma le Teuila. O le tele o taamilosaga e maua ai e lenei tamalii le faailoga o le olo silia i taamilosaga nei e lua o le Pimka ma le Teuila lea sa iloga ai le tauau malosi o lea taamalii. Ina ua fesiligia le susuga ia Agafili Elia i sona lagona i le faafoeina o lana au ua mafua ai ona ausia le lelei maualuga i le taaloga o le kirikiti, ae na tali Agafili e faapea, e mafua ona manumalo se au o le galulue faatasi, e ala lea i le lagolago o le tuaa i le faatea. O le faatea e taumafai o ia i le pe i le olo, ae afai o le polo e finau foi le faatea e fai ni polo e tata ai le au. O le faamoemoega o nei mea uma o le tuaa, a lagolago le tuaa e faigofie foi le galuega a le faatea. 

Sui o le komiti faafoe o le Teuila ma le kapeteni o le au malosi a le Malaka tauaaoina o le talita

I lana ia tiute faalekapeteni i totonu o le taaloga ia aua lava nei popole se kapeteni pe a vaai atu ua tulaga faaletonu le taaloga, e tatau i le kapeteni ona tausolomua i le malae ona ia faafiafia i lana au, aemaise lava i le taimi o loo iai le au i le tuaa, pe ua tulaga faigata foi le taaloga. Ia aua nei loto ita ae ia naunau lava ia faamalosia loto o tama taaalo e fai le taaloga. Ae a oo i le taimi e vili ai le tupe ae sau e pate muamua le Malaka ona fautua lea o Agafili i lana au e faapea, a maua loa le avanoa e ta ai le tagata ona aua loa lea e ta ae aua nei toe faalagolago mai i le isi tagata lea i lalo, ae a faapea o lea e tuli ai lana au, e ese foi ana ia auala e fesuisuiai ai lagona o tama taaalo ina ia ausia le sini autu o le taaloga ina ia mafai ona manumalo i le taaloga. O le tumutumuga lava o le taaloga ia to’a lelei le kapeteni ma ia aua nei popole ma ia taumafai lava le kapeteni e faafiafia lana au i taimi uma o le taaloga.

I le faamaeaina o le taamiloaga o le Teuila na momoli ai le agaga faafetai a le afioga i le Peresetene PIMKA  i kapeteni o au taitasi, a tamaitai ma alii i le faatautaiga o le taamilosaga i lenei tausaga o le Teuila. O lana faafetai faapitoa foi na momoli lea i le komiti faafoe i le galulue faatasi ua faataunuuina ma le manuia taaloga.

Iuga o taaloga a le Teuila.

Au Alii.

Siamupini le Malaka 2, tulagalua le Maata, tolu le Saint, ina ua malo i le Povi Poa lea na saili ai le tulaga tolu ma le fa.

Au Tamaitai

Tulaga muamua – Ao Atua, (2) Nifoloa, (3) Vaipuese (4) Tautua.