Sii faatasi e ekalesia e 7 le viiga o le Aso Maliu

O le Eseta o le tasi o aso pito i tāua i le kalena faaletalitonuga kerisiano, e pei ona talitonu ai Samoa ma faavae ai i le Atua le Tamā, le Alo ma le Agaga Paia.
O le Eseta poo le Aso maliu e pei ona lausilafia ai, e faamanatu e kerisiano uma lava o le lalolagi, ae eseese le faatinoina ma le faatāuaina i totonu o Ekalesia aemaise o atunuu, ae tasi lava le pogai ma le autū, o le toe tepa ma faamanatu le maliu ma le toe tu manumalo a‘e o Iesu Keriso le Alo o le Atua mai le oti ma le malosi o le tuugamau.
E pei foi ona masani ai le tele o Ekalesia, e fai sauniga lotu i le Aso Faraile lea e pa‘ū tonu i ai le Aso Maliu.
I le Ekalesia AOG koneferenisi Samoa i Melepone, e lima ona lala o loo tapuai ai le paia ma le mamalu o Samoa.
Na tasi le finagalo i susuga i faafeagaiga e ao ona fai sa latou tuufaatasiga i le Aso Maliu ma tapuai faatasi ai le Ekalesia atoa.
Ae na maitauina le fai tapuaiga faatasi atu i ai o isi ekalesia e lua, ona fitu ai lea o ekalesia na o latou sii faatasi le viiga o le Eseta i le malumalu o le Ekalesia a le susuga i le taitai o le Setete o Vitoria, le susuga ia Apouani Unasa ma le faletua ia Olevia i le pitonuu o Thomastown.
Na saunoa se tasi o faafeagaiga, o le faataimuaga lea o mafutaga faatino o le Eseta, lea na faaiuina i le polokalame mo tupulaga talavou (youth rally) i le afiafi o le Aso Sa. Sa matuā faatumulia ai le malumalu tapuai o le susuga ia Solomona Vaofusi ma le faletua ia Moana i le pitonuu o Hppers Crossing.
O le mamalu o faafeagaiga o galulue faatasi ai i le Setete o Vitoria, o le susuga a Tavita Anetipa ma le faletua ia Eseta i le pitonuu o St Albans, o le susuga ia Tofao Lalotea ma le faletua ia Leafaitulagi i le pitonuu o Mt Waverly, ma le susuga ia Teofilo Robertson ma le faletua ia Asalele i le pitonuu o Narre Warren.
O isi ekalesia e lua sa fai tapuaiga faatasi ai ma le AOG Samoa i Melepone, o le susuga ia Filipo Vaafusuaga ma lana ekalesia ma le susuga ia Faiumu Faletuai.
O le susuga ia Tavita Anetipa na taitaia le sauniga tuufatasi, ae o le upu folafola na saunoa i ai le susuga ia Apouani Unasa.