Ua manumalo Laauli Joseph Parker i le fusuaga a matai Samoa i Rhode Island, Amerika. O se fusu’aga e mata’utia ona o le toa ma le malosi o Fuamatu Alex Leapai i totonu le maea. Na taofia e le laufali le fusu’aga i le taamilosaga 10 ona o le saputu o tu’i malolosi a Parker i foliga ma le tino o Leapai, e ui e lei vaaia se tulaga e ono palasi Leapai mai tui malolosi a Laauli ae na taofia e le laufali le fusu’aga ona ua mamao le manumalo a Parker i taamilosaga uma ia mae e lei foliga mai na mafai ona tali e Leapai ia osofaiga i ana ia foi tu’i. Ana fa’apea e togi lima o Leapai se manu e fa’aauau e le laufali le fusu’aga ina ia tu’u ia te ia le avanoa e fa’asao ai se fa’alava po’o se so’a e lavea ai Parker. Ae e leai, e na’o le tali tu’i o Leapai i taamilosaga uma e sefulu ma fa’apea ai le laufali ua lava lea. O se faaiuga lelei tele na faia e le laufali mo le saogalemu o Leapai.
O le faitau a Compubox e 157 tu’i malolosi a Parker na sao i le tino ma foliga o Leapai ae na’o le 37 tu’i a Leapai na sao i le taaloga atoa. Ae o le mea moni e lei lavea Leapai i se tulaga faigata e pei ona masani ai fusu’aga fa’apea. E ui na matua vaaia le sela o le alii Laulii o loo aumau nei i Ausetalia ae e lei solomuli o ia ma sola ese ma Parker.
E leai se manatu e o’o le fusu’aga i taamilosaga ia aua e na’o le lua vaiaso na tapena ai Leapai mo le fusu’aga. O le faitau foi a le to’atele e uma le fusua’aga i taamilosaga amata aua e le’i leva on toleni Leapai. Peitai, na maualuga le tulaga na o’o iai le fusu’aga ona o le umi o malosi Leapai, na fiu tui malolosi a Parker e lei palasi Leapai.
Ae mai lava i le taamilosaga amata ona lavea Leapai i so’a, agavale ma taumatau malolosi a Parker i le tino ma foliga. Na lagonaina foi e Leapai le malolosi o ia osofaiga na sasa ai lona tino. Ae e lei mafai ai e Parker ona fa’auma ia Leapai.
O foliga ia o taamilosaga taitasi uma lava e sefulu. A ta le logo ona o atu lea i totonu o tama ma amata ai ona tu’i e Parker le tino ma foliga o Leapai aunoa ma le pa’u o Alex A uma lea tolu minute ua toe fai foi, na’o tu’i ma tu’i na pa i tino o Leapai. E lei manaia i le vaai.
E lei mafai foi e Leapai ona tete’e i osofaiga a Parker pe fa’atu sana ia osofaiga e talia ai osofaiga a Parker.
Na vaaia le le fiafia o Leapai ina ua taofia e le laufali le fusu’aga aua e le’i faapea na tigaina tele o ia. Ae na ta’ua e Kevin Barry le faiaoga a Laauli sa tatau i le laufali ona taofia le fusu’aga i luma atu ona o le tele o tu’i a Parker e le’i talia e Leapai. Na avea ai Leapai ma se tagata-fasia i totonu o le maea, sa tatau ai ona vave taofia e le laufali le fusu’aga.
I le mae’a ai o le fusu’aga na vaaia ai se tualga matagofie ina ua fufusi le ‘au uso Samoa ma fa’amalo le tasi i le tasi i le taua lelei na feagai ma la’ua.
Ona si’i ai lea e Fuamatu le lima taumatau o Laauli i luga o ia o le siamupini. A’o le ata o lea taga, e vaaia lelei ai le i’uga moni o le fusu’aga e pei ua si’i uma ai lima o Laauli ma Fuamatu o la’ua uma o siamupini i Rhode Island.
O se mata’aga manaia ma le matagfoie aua o le lagona foi lea o le to’atele ina ua mae’a le fusu’aga e ao lava ona vi’ivi’i Fuamatu ona o le toa ma le malosi o lona loto. E lei solomuli, e le’i pa’u foi, e le’i fa’afiti foi i faigata na o’o ia te ia i totonu o le maea.
Na ta’ua ai e Parker i le iuga o le taaloga le malo o le muaulu o Alex ina ua fiu e ta-tu’i ae aunoa ma se afaina o Leapai. O uiga faigata ia o le fusu’aga na vaaia e tagata uma. Ua mae’a ai le taumafaiga a Alex Leapai i le faiaina ma ua o’o ai talaaga o ana fusuaga i le 32 manumalo 8 faiaina ma taaloga tutusa e fa (36-8-4).
Ae o Parker ua o’o lana fuainumera e 26-2-0. O le uluai fusu’aga lea a Parker i lalo o lana pulega fou, le Matchroom Boxing. E toe lua fusu’aga o totoe o le feagaiga amata a Parker ma Eddie Hearn, o le a fa’atalitali nei po’o ai o l ’a soso’o e fusu ma Parker.
E iai le fa’amoemoe o le’a toe oso Parker i totonu o le maea i le fusu’aga a Andy Ruiz Jr ma Anthony Joshua o lo’o fa’amoemoeina mo le masina o Novema po’o Tesema.
E lei iloa le nofoaga e fai ai lea fusu’aga. Ae mo le taimi nei o le fa’amalo ma le faafetai e ao ona momoli i le mae’a ai ma le manuia o le fusu’aga a Parker ma Leapai.
