O faafiafiaga faa-Polenisia e faaalia ai le tomai i le si‘aina o le afi, aemaise le siva ailao e faaaogāina ai le afi ma le naifi (agaese) – o se tasi lea o vaaiga mataina i taimi o faafiafiaga, o loo vaaia pea le alualu i luma o le talenia o nisi o alo Samoa ma le Pasefika o loo latou faatinoina ia faafiafiaga.
O se taimi e lei mamao atu i totonu o se tasi o aai i Hawaii, sa faia ai se tauvaga mo le sailia o se siamupini mo le siva ailao afi.
E maoa‘e faailoga na tapenaina mo lenei tauvaga. O le siamupini na foai atu iai le tinoitupe $4,000 ma le Ipu (trophy). O le faailoga lua o le $2,000 ma le Ipu, ma le faailoga lona tolu e $1,000 ma le Ipu.
E 4 aso na faagasolo ai polokalame o lenei tauvaga ma e siliga ma le sefulu afe tagatanuu eseese na tumutumu ai i le faagasologa o nei tauvaga.
O le tala fiafia, ona o nisi o alo o Samoa sa faamanuiaina i lenei tauvaga, e pei o le susuga ia Malo Matau na ia mauaina le faailoga lona tolu, Falaniko Penesa na ia mauaina le faailoga lona lua faapea ma le siamupini na faamanuiaina ai le susuga ia Via Tiumalu.
O le alii o Falaniko Penesa ua galue nei i Hong Kong i lana taleni o le siva; o le alii na manumalo, o Via Tiumalu Jr. o loo galue foi o se tagata faafiafia i le siva ailaoafi i Orlando Florida, a o Malo Matau o loo galue o se tagata faafiafia i nisi o faafiafiaga i Hawaii.
