O le faaiuga o le masina o Setema sa faia ai se tauvaga o faaaligatino i Kuiniselani. O lenei tauvaga e lē na o Samoa, ae sa aofia ai ma papalagi ma tagata mai isi atunuu.
Sa faataunuuina i Southport Gold Coast e saili ai se sui o Kuiniselani mo le tauvaga tele a Ausetalia (National Body Building Association).
Sa tulaga ese le maimoa aemaise le silasila a faamasino i le alo tauva o Samoa. Ua na o ia lea o le sui tauva mai le Pasefika.
O le susuga lea ia Toavalu Fano Meleisea, mai afioaga o Poutasi i Falealili, Lefagaoalii i Safune & Fatausi i Safotulafai.
O se mitamitaga i mātua o lenei alii talavou aemaise aiga ma Samoa uma sa mafai ona faafofoga i le tulai mai o le alii o Toavalu Fano Meleisea i lea taumafaiga ua ta‘u ai foi le igoa o le atunuu.
Ua 32 nei ona tausaga, ma ua tasi le tausaga talu ona ofi mai i totonu lea alo o Samoa.
O le manumalo o lenei alii, sa filifilia ai o ia e malaga atu i Sydney e fai ma sui o Kuiniselani i le tauvaga tele, ma o se tala fiafia ina ua ia mauaina le tulaga muamua ma avea ai loa o ia ma siamupini ia Ausetalia atoa.
Ua matuai lagona le fiafia uma o ona aiga i soo itu o lenei lalolagi ina ua manumalo mai lea tauvaga sa uigaese le toatele o le ‘au tauva. Faaalia e mātua o Toavalu, le tamā ia Toaiva ma le tina ia Susana Meleisea, e fiafia tele le atalii e alu i le gym e koleni, ma o lona naunautaiga ia faatuputeleina pea lona malosi auā le taleni ua faananau ma fiafia i ai lona loto.
E fiafia o ia e feiloai atu i ona aiga ma nisi tagata.
O le isi itu e faaalia ai le agaga fiafia o Toavalu ona ua ia mauaina se avanoa e na te tauaveina ai le igoa o lona aiga, lona nuu faapea le atunuu o Samoa i se taleni ua agavaa e faaalu ai lona taimi.
