“O le manumalo ma le faamanuiaina o se lagona faagaeetia lea, ua lē gata ia te a‘u le faiaoga, le komiti faafoe, le kapeteni ma tama taaalo, faapea i latou uma sa lagolagoina le faamoemoe ae tainane o nai aiga na tapuai a o alofaiva tama o le Samoa United i le latou taaloga, e ao ai ona faafoi le viiga sili i le Atua”, o se saunoaga fiafia lea a le alii faiaoga, Sooalo Alatimu Iese Alatimu ina ua sola lana au lakapi taitoafitu ma le siamupini o lenei tausaga. O Sooalo Alatimu mai le afioaga o Salei‘a i Avao & Samauga sa avea ma faiaoga mo le au lakapi a SCOPA i le taitoafitu ma le to‘a sefululima mo ni tausaga se tele.
O le taamilosaga taitoafitu lenei e tumutumu i ai le toatele e maimoa ma tulimatai pea i tausaga uma, lea la sa faataunuuina i le malae taalo i Woodend i le faaiuga o le vaiaso talu ai.
E 24 au lakapi na auai mai le itumalo o Canterbury e aofia ai Nelson ma le West Coast ma vaevaeina i Pools e valu. E toatolu nisi au lakapi o tama fanau Samoa sa auai e pei o Lotofaga ma au e lua a le Aana Boys.
O le uluai taimi lenei ua manumalo ai Samoa United i le ipu o le taamilosaga ina ua ia se‘iina mai le au malosi o le Scorpions (Tasman) siamupini 2010.
O se taaamilosaga sa matuā faigata lona finauina ona e leai se au na alo faatamala.
Na faamanuiaina Samoa United i lana taaloga mataina ma le Scorpions, ma toe taaalo ai loa ma le au malosi o Marist Albions i le semi finals ma manumalo ai.
Na faaalia e Alatimu o le itu malosi sa faamamafaina,o le fitness ia lava e mafai ai ona malosi le latou defence ma o le game plan lea sa matuā utagia ma usitaia e tama taalo uma lea na manuia ai faiva.
O le sueina la o le siamupini lea sa taaalo ai ma le isi foi au malosi Canterbury University ma manumalo ai i le sikoa 27 – 21 i se taaloga sa faigata tele ona ua mataalia au e lua aemaise o le taumateina o mafaufauga faatama taalo i luga o le malae i le tau lalata o le a uma le taimi faatulagaina ae o loo tutusa pea le malolosi o au e lua.
O le au Canterbury Samoan sa latou umia le siamupini i le 1999, lea ua maua nei e Samoa United, pau ia o au a tama fanau Samoa ua umia lenei ipu anagata o le taamilosaga.
O tama taaalo o alo ma fanau i Kalaiesetete na soifua mai Samoa ae lei malaga mai i Niu Sila.
O loo lagolago sua Steve Fualau (sui o le Canterbury NPC team & Manu Samoa 2010) faapea foi ona taalo ai Laki Mulipola (Higlanders & Manu Samoa).
O le faamoemoe maualuga ina ia maua ni alo ma ni tama fanau e filifilia mo au fili a Niu Sila poo Samoa foi.
O suafa nei o tama taaalo: Siologa Leota (kapeteni), Finauga Segi Tito, Sanele & Anthony Tailua, Faigame Tevita, Penaia Leatigaga, Ben Timo, Karl Uilelea (player of the tournament) Laki Mulipola, Fetuao Luaufui, Keneti Alatimu, Eteuati Sitagata.
O le komiti faafoe: Fata Siliva (faiaoga lagolago), Fiu Sefo Tito, Sooalo Tavesi, Vitale Ilalio ma Maatusi Fesolai.
Ua mae‘a nei taamilosaga taitoafitu o lenei tausaga ma ua faata‘ape foi tama i latou kalapu masani o loo taaalo ai.
E avatu ai le faamalo i au uma a le atunuu sa auai pei o Lotofaga ma Aana Boys, malo le taalo faatausala ae toe alo ane mo le isi foi tausaga pe a aulia.
