Ua mae’a i le faaletonu taumafaiga a le Samoa A i Fiti na tauva ai i le tafatolu a le Pasefika ma ‘au a Fiji Warriors, Junior Japan ma Tonga A. Ua uma le taamilosaga e aunoa ma se manumalo e tasi a le ‘au. O le taaloga mulimuli ma Fiji Warrior, na toilalo ai Samoa ia Fiti i ‘ai 48-16. O ‘ai uma a Samoa na maua e Alai D’Angelo Leuila, tasi le sikoa ma le kiki ova, ma sala e tolu.
O Samoa na amataina ‘ai o le taaloga, e tolu sala na a’a e Alai ma sili ai ‘ai o le ‘au, 9-0. O lea amataga mo le kuata o le taaloga na lelei ai le taalo a le Samoa A a’o tau faatonutonu le ‘au a Fiti.
Na faato’a tali Fiti i le minute 18 o le taaloga i le sikoa a Eroni Mawi. Ona matala ai lea o le faitotoa mo le isi 20 minute ma amata faaputu ai sikoa e fa a le Fiji Warriors a’o lei oo i le malologa.
E 9-24 ‘ai o le taaloga i le malologa. Na toe faaopoopo le isi 24 ‘ai i le ‘afa lona lua e auala i sikoa e fa a Fiti e atoa ai le valu o ana sikoa i le taaloga atoa. Na faato’a maua le sikoa a Samoa e auala ia Leuila ae toe 10 minute o totoe o le taaloga, a’o 34-9 ‘ai o le taaloga. O Fiti na faai’uina le taaloga i isi sikoa e lua e faamae’a ai le Pacific Challenge 2019.
O le tulaga lava lea na iai taaloga uma a Fiti i le taamilosaga, e matuā vava mamao le maualuga o le taalo a Fiti faatusa i le taalo a Samoa. O Fiti e matuā loto tasi tagata uma, saoasaoa ma mau foi polo i lima. A’o le tauivi foi i totonu o polo pue, ma polo lusi e maeu foi le lelei o le ‘au i ia vaega o le taaloga.
Pau se tala fiafia mo le Samoa A, o ‘ai pa’u ia a Fiti i ana taaloga e tolu. E sili atu ai ‘ai a Fiti na maua ia Tonga A ma Junior Japan, i lo ‘ai o le taaloga ma Samoa.
Samoa 12 Tonga 13
Sa tatau ona manumalo Samoa i le taaloga ma Tonga A. Ae ona o le faatamala lava o le ‘au na toe tuu atu ai ia Tonga le avanoa e sikoa ai ae ua mae’a le taimi. O Samoa na kikiina i tua le polo ae toe 20 sekone o le taimi o totoe. Ana taofiofi pea le polo seia oo ina uma le taimi semanu e maua le malo e tasi a le ‘au.
E tele mea sese na faatino e Samoa A, e faapea foi Tonga. E lei mafai e ‘au e lua ona taalo i se ituaiga taalo e mafai ai ona maua le malo.
O ‘ai o Samoa na maua i sikoa e lua a Leuila i le ‘afa muamua ma le numera ono o Paul Faalogo. E tasi le sikoa a Tonga na maua ma le latou sala. Ae toe lima minute o totoe o le taaloga na sili ai ‘ai o Samoa 12-10. Na finau ai Tonga i totonu o le 22 a Samoa A. Na toeitiiti lava sikoa Tonga ae toe pa’ū ma le polo.
O iina na a’a ai e Samoa le polo mai le 22 agai i le ‘afa o le malae ae toe 2 minute o totoe. Na toe faatamo’e e Tonga le polo agai atu i le itu a Samoa A, ae na pa’ū le polo i le pue. Na toe maua ai loa e le foueti a Samoa A le polo i le ‘afa o le malae ae toe 70 sekone o totoe. Na faatelegese le taalo, e faapasi ai le taimi, na ave i tua le polo ae toe 20 sekone, na a’a ai i tua e Samoa le polo, ae o loo totoe pea le taimi.
Mai le lineout a Tonga, i totonu laitiiti o le ‘afa a le Samoa A na solitulafono ai le ‘au ma faasala ai.
O le alii kapeteni o Liueli Simote, o le fulupeki foi lea a le ‘au, na faia le filifiliga e a’a mo le pou. O le mamao, e mai le ‘afa o le malae. E matautia faiga a Simote ina ua ova le a’a ma tutusa ai le taaloga, ona o faaletonu lava a le Samoa A.
Ua mae’a ai ma taaloga a le Pacific Challenge e aunoa ma se malo o le Samoa A na maua. O ā lelei o le Super IX a le atunuu, e lē o vaaia ni fua lelei o lea taamilosaga i taaloga faavaomalo, aemaise lava i le sikalamu, ma le lineout. E pei ua toe alu i tua le malamalama o le lakapi Samoa.
Pacific Challenge
Round 1: Fiti 56 Toga 14; Iapani 31 Samoa 21
Round 2: Fiti 66 Iapani 24; Toga 13 Samoa 12
Round 3: Iapani 39 Toga 10; Fiti 48 Samoa 16
