O le tauvaga tele International Federation of Bodybuilding (IFBB) New Zealand Champs 2019, sa faia i le Vodafone Event Centre i Aukilani i le Aso Toonai, ua sola ai nei le au masii mai Samoa ma le siamupini aoao o le tauvaga.
O le alii o John Lemoa mai Samoa e le gata ina tulaga muamua i le tauvaga Open Men’s Bodybuilding i lalo o le 100kg, a o ia foi lea ua manumalo aoao i le tauvaga teuteu tino a alii poo le Overall Winner Open Men’s Bodybuilding. O le tamaitai o Tunu Nancy Matautia Elisara mai Samoa na tulaga muamua i le tauvaga Women’s Wellness, tulaga muamua Women’s Physique, o ia foi lea ua manumalo aoao i le tauvaga tino maloloina poo le Overall Winner Women’s Wellness and Physique.
Faaalia e Tofilau Esther Tofilau le Peresetene o le IFBB a Niu Sila, “O se tulaga maualuga ua toe oo nei i ai le tauvaga teuteu tino a Samoa.” O isi sui tauva o le ‘au masii a Samoa e aofia ai PenititoTanielu Seuao na tulaga muamua i le Open Men’s Bodybuilding i lalo o le 90kg, toe tulaga muamua i le Junior Men’s Bodybuilding. O le alii o Elli Albert Wilson na tulaga muamua i le Open Men’s Bodybuilding i lalo o le 80kg. O isi o le aumalaga e aofia ai le taitai malaga ia Dwayne Bentley ma le Peresetene o le asosi teuteu tino a Samoa le afioga Magele Johan Keil.
O le vaiaso atu i tua sa auai le ‘au a Samoa i le tauvaga teuteu tino faavaomalo a le Pasefika sa faia i Tahiti, lea na manumalo aoao ai foi le alii o John Lemoa i le tauvaga a alii. Saunoa Magele, “O le masina fou le tauvaga a Samoa, ma o loo tatala le avanoa i soo se Samoa o loo alala i Niu Sila poo soo se atunuu i fafo e fia tauva, aemaise pe a fia ofi atu i le au a Samoa mo tauvaga i fafo.” O le tausaga fou o le a tali malo ai Samoa i le tauvaga teuteu tino faavaomalo a le Pasefika.
E toatolu isi alo o Samoa sa tauva mo Niu Sila i le tauvaga teuteu tino. O le susuga ia Ilai Faamita o Glen Eden na manumalo aoao i le vaega o alii tino manaia poo le Overall Winner Men’s Physique. O le alii o Ralph Aukuso o Mangere na tulaga lua i le Open Men’s Bodybuilding i lalo o le 90kg. O le toeaina o toeaina o Amos Ale e 65 tausaga o Manurewa na tulaga muamua Men’s Physique 1.67 class, tulaga lua i le Men’s Bodybuilding i lalo o le 70kg, ae tulaga tolu i le Masters Men’s class.
O le tofia ai e le International Federation of Bodybuilding (IFBB) o le afioga ia Tofilau Esther Tofilau i le tausaga ua tuanai ma Peresetene o tauvaga teuteu tino a Niu Sila, ua faapea ai foi ona toe lalaga tauvaga a Niu Sila aemaise o avanoa e tauva ai i tauvaga faavaomalo. O le masina o Novema o le a faia ai le tauvaga a le lalolagi i le vaega o alii poo le IFBB Men’s World Bodybuilding Champs i Dubai.
O le susuga ia Fosi Schmidt o le alo lenei o Samoa sa avea ma Mr. Olympia i le tauvaga a le lalolagi 1995 Masters. O nisi o alo o Samoa sa maualuga foi lo latou taumafai mo Samoa e iai Tony Ligaliga, Tony Sila, David Barry ma John Afoa. Mo nisi faamatalaga i tauvaga teuteu tino a Niu Sila, faafesootai Tofilau Esther Tofilau (021) 0292-6670.
