O se aiga e soalaupule lelei ma faatulaga fuafuaga fai, e lē pine o se aiga foi lea e taunuu ai le fetalaiga a Iesu i ona soo, ia maua le fealofani. Na lolofi atu le tele o ulugalii i le fia molimauina o le semina na faagasolo i po e 5 o le toe vaiaso o le masina o Iuni, sa faamamafaina ma faatāua ai mafutaga i le va o ulugalii.
E lē gata ina ia faamausaliina ai le alofa moni o le tamā i le tina, ae faapena foi i le tina i le tamā. O lea semina sa faatautaia e le faiaoga ua iloga ona faailoga i tulaga tau aiga, e pei ona silafia ai e le toatele, o le susuga lea ia Pr Samuelu Afamasaga mai Fasitootai.
O lenei auauna o loo ofo fua lona taimi e faia ai se polokalame i luga o le Penina o Asuisui Switch1197am, ua faaigoaina “A iai Iesu i se aiga, o se aiga fiafia”. E tulitatao e nisi ona o le gagana lata mai o loo ia faaaogāina, ma le maoae o lona tomai i le momoliina lea o fautuaga ma lapataiga auā le faaleleia atili o mafutaga i totonu o aiga.
E loloto mataupu o loo tautalagia e lana auauna, ma na saunoa Pastor, o le aano moni foi lea e faigofie ai ona manino ma ulugofie le tāua o lenei semina faapitoa, pe a faaaogāina le gagana o aso faisoo, e o lua ma le faa-Peretania e vave ai lava le kilivaina o le fe‘au.
Ou te lē fatu fua se tala auā ua tele aiga ua faatamaoaiga ai, ma ua gagana ai i ni fuaitau faapea, “Seki a le polokalame o le Aiga fiafia” ua mafai foi ona toe faafouina ai mafutaga, aemaise le faatāuaina o le uluai alofa na totōina mai le amataga.
Mo le silafia, na mafua ona a‘e se tofā i le faiaoga e faia se semina e ese mai i le polokalame i luga o le alaleo, ona e iai nisi o vaega e tatau lava ona talanoaina na o ulugalii a o mafai ona tuusa‘o fesili ma toe tali atu e aunoa ma le faafofoga mai o tagata matutua ma fanau faapea i latou e lei faiaiga.
O le po la o le Aso Faraile aso 1 o Iulai, sa faaiuina ai i se faaipoipoga saunia lelei sa toe faafouina ai le feagaiga a se tasi o ulugalii. Na lē gata i le fai o a la uosili ae na toe toso lelei le veli o le tamaitai.
Ua leai lava se eseesega ma se ulugalii faato‘ā tuufaatasia e ala i le sakalameta o le faaipoipoga.
Na matuai ofo le aofia i le matagofie o le tapenaina faafafine toaga e le auauna o lea semina faapea le faatinoina o le faaipoipoga, ona alo lea o le Komiti Faamisionare i le tufaga tusipasi ma faaiuina ai i se taumafataga tele i lea afiafi.
Ua lapataia pea e le faiaoga ulugalii uma ina ia femalamalamaai le isi i uiga o le isi ma taumafai e faataga le fiafia e faaulufale mai, o le a manuia ai ma solosolo lelei le mafutaga, ae faaitiitia le tauaimisa ma feainai, e leai se taunuuga.
O le auga o ia semina uma na tuufaatasia lea i se uiga moni e faapea, ia onosai, maua le lotomaulalo e mafai ai ona faamagalo ma faagalo ni fatia ma leaga, ma ia ava le tasi i le tasi.
O le isi tulaga na faamamafaina, o le taumafai lea o le tamā e tuuavanoa i le tina i ni mafatiaga faalemafaufau, faapea foi i le tina, ia malamalama i le tamā.
