O le tausaga ma ona seleselega o le fuata foi ma lona lou, o le tamaitiiti foi ma lana tauiviga aemaise foi o nai mātua ma le tiute tauave o le unaia o fanau i Aoga Aso Sa. E matagofie ma manaia tele lagona o le faagaeetia ma le mitamita pe a oo mai taimi o laugatogi i seleselega a fanau mai i totonu o Aoga Aso Sa auā o le isi lea vaitau o le tausaga e mitai i ai le vaai a mātua poo ā seleselega a nai fanau e tusa ma a latou fua na lulu o le tausaga.
O lenei foi tausaga i le laugatogi a le Iuni o Aoga Aso Sa i Niu Sila nei (NZSSA), sa maitauina ai foi le matagofie ma le taupati atu o nai mātua ma aiga e molimauina ma faaoo atu le loto fiafia i fanau uma na mafai ona lautogia i le suega faaletausaga masani a le iuni. Na faaalia o loo olaola pea lenei iuni e ala i le faaopoopoina pea o le fuainumera o Aoga Aso Sa resitara atu i lea tausaga ma lea tausaga.
O le Aoga Aso Sa a le Ekalesia Emanuelu i Papatoetoe le isi Aoga Aso Sa ua lua ai nei tausaga talu ona ofi atu i totonu o le faalapotopotoga a le NZSSA, ma ua maitauina le lelei o taumafaiga a nai alo ma fanau sa tauiviina suega ma mataupu na suesueina o lenei foi tausaga.
O i latou e toatolu na faamanuiaina i le suega a le NZSSA i Niu Sila atoa e aofia ai alo e toalua o le susuga ia Scott ma lona faletua ia Titile‘au Tulua, le tamaitai o Popoai Tulua ma le tama o Zak Tulua aemaise foi o le tamaitai o Manora Leatigaga o le alo o Sam ma lona faletua ia Cynthia Leatigaga.
Ia e lē uma le loto faafetai ma le agaga vivii i le Atua ona o ana faamanuiaga i taumafaiga ma tauiviga a nai fanau auā e lē faigofie foi le feagai o nai fanau ma le suesueina o mafaufau. Ae o le mitamita ma le lagona e pei lava o upu masani o le tama poto e fiafia le tamā a o le tama valea e faanoanoa le tina.
Peitai o se faamalosiau lelei tele le unaia o fanau i Aoga Aso Sa auā le tomatauina o lo latou olaga mo le lumanai. Ia e lei faaitiitia le faafetai e le foi a mātua i susuga i faafeagai ma o latou faletua aemaise o vasega faiaoga Aso Sa mo le galuega o le aoaoina o fanau ma le tapenaina auā suega faaletausaga a le faalapotopotoga a le NZSSA.
