Na atoa i le masina o Mati, le silia ma le sefulu tausaga o faagasolo le faiga faasuetupe a le faalapotopotoga o le Leukaemia and Blood Cancer NZ(LBC’s), ua faaigoaina o le ‘Shave for a Cure’ (Selepoo le ulu mo se Vaifofo). I tausaga taitasi, e lototetele ai le faitau afe o alii, tamaitai ma fanauiti i Niu Sila, e selepoo pe selemole o latou lauulu auā se seleni mo lenei faalapotopotoga. Talu ai e lē maua se fesoasoani tau seleni a le LBC’s mai le Malo, ua avea ai le ‘Shave for a Cure’ o le sailigatupe autū a lea faalapotopotoga.
I se fuafaatatau, e toaono tagata Niu Sila e faailoa atu i ai ua aafia i latou i le kanesa o le toto e pei o le leukaemia, lymphoma ma le myeloma – ma isi lava gasegase e fesootai atu i le toto. O le toatele o i latou nei, e toulu o latou laulu a o faagasolo togafitiga.
Talu ona amata mai lenei sailiga tupe, ua maitauina ai foi le lagolagosua a ē mautofi ma faaaloalogia i totonu o Niu Sila. O le tausaga na tea nei, na selemole ai lauao a le aulakapi a le Chiefs, e aofia ai ma Sonny Bill Williams, ma isi alo Samoa o loo taaalo i le ‘au o loo uumia le siamupini o le Super 15 o le 2012. Na vaaia foi i totonu o le Beehive a o faagasolo le saofaiga mo le 2012, nisi o sui o le Palemene ua faapena foi ona selemole o latou lauao.
O moomooga a le pulega a le LBC’s mo le taumafaiga o lenei tausaga, ia sili atu le tupe maua nai loo le 1.4 miliona tala na maua i le 2012. E oo mai i le taimi na lomia ai le tatou pepa, ua latalata i le miliona tala le tupe ua aoina, ae 2,698 i latou ua tusia o latou suafa e selemole o latou lauao, e aofia ai foi ma se alo o Samoa, le afioga ia Tauiliili Petelo Li‘a.
E pei ona silafia, o le afioga ia Tauiliili, o sē e faasalalau i le leitio, pese, faafiafia ma o loo iai foi i se ata tifaga mo le a‘oa‘oina o le gagana Samoa i totonu o aoga i Niu Sila nei. O le aso 14 o Mati, na maimoa ma faafofoga ai le toatele i luga o le alaleo o loo tautua ai Tauiliili, a o selepooina lona lauao e le alii faasalalau, le susuga ia Malo Toe.
O le vaiaso na tea nei na atoa mai ai le aofaiga o tupe na ofoina mai e ana uo ma ona tauaiga mo lenei faamoemoe. E fia faafetaia e Tauiliili le lagolagosua, lea na ia mauaina ai se seleni, e sili atu nai lo o le mea sa ia faatalitalia.
“Na ou faatuina le $500 e fai ma fuainumera faaataata, ae na matuai lagonaina lava le loto talisapaia ma le faatauvaa, ina ua ou vaai atu ua oo la‘u tupe $710.
I lenei taimi o le taugata o le soifuaga, o se faalaeiau le iloa o loo iai pea nisi o loo nofo sauni e faataulaga a latou tupe suegata, auā se lelei ma le fiafia o isi. O seleni uma lava e maua e faaalu lea mo le tuuina atu o le lagolagosua i lē ua aafia i le lukimia faapea ma lona aiga”.
Na ta‘ua e Tauiliili sa lē na o Aukilani na maua mai ai lenei seleni. “Faafetai tele lava mo le foai mamao mai i le susuga ia Kennaway Gotoolefatu mai Palmerston North ma le susuga ia Fred Iona o Hawkes Bay.
E leai se tasi o le aiga o Tauiliili o aafia i le lukimia, ae na ia ta‘ua le mafuaaga na lotomalie ai e selepoo lona lauao, ona “o le lukimia o le kanesa taatele lava lea i tamaiti. Ma e ese le ootia o lo‘u loto pe a ou vaai atu i se tamaitiiti o loo faatigaina e lenei ma‘i.
Ina ua tulai mai lenei avanoa, sa ou tuuina i luga lo‘u lima e ofo atu lo‘u laulu mo se vaifofo, auā se mapusaga mo ē ua aafia. E le gata i lea, na ou manao foi e siitia le silafia a Samoa e faatatau i lenei gasegase o le lukimia aemaise lo‘u fiafia i le sipili faa-Kiwi o le faapuapuagatiaina lea o se tasi i mea faavalevalea, auā lava se lelei o isi”.
O le tausaga na tea nei, e pei ona silafia, na ofoinaina atu ai foi e le Palemia o Samoa, Tuilaepa Sailele Malielegaoi, lona lauao e selemole mo le kanesa.
Nisi manatu e faatatau i le kanesa o le toto:
• O aso taitasi, e toaono tagata i Niu Sila e aafia i le kanesa o le toto – e tusa lena ma le 2,200 tagata i le tausaga
• E lē o iloa poo le ā e faapogaia le kanesa o le toto
• E mafai e nei faama‘i ona aafia ai soo se tasi, poo le ā lava lona matua, i soo se taimi, e aunoa ma ni faailoilo
• A tuufaatasi uma kanesa o le toto (leukaemia, lymphoma ma le myeloma) e lona lima i kanesa taatele i Niu Sila
• E ono manaomia ona faia ni togafitiga e aunoa ma se toe faatali ma e ono faagasolo nei togafitiga mo ni masina poo ni tausaga
Leukaemia
• O le lukimia o le kanesa taatele lea i tamaiti
Lymphoma
• I Niu Sila, e lona ono le kanesa o le lymphoma i le faasologa o kanesa taatele lea e latalata atu i le 900 tagata e aafia ai i tausaga taitasi
• O le kanesa o le Lymphoma e aafia tele ai i latou i le va o le 15-24 tausaga
Myeloma
• E pe ā ma le 300 tagata i Niu Sila e aafia i le kanesa o le Myeloma i tausaga taitasi
• O tagata Pasefika ma Maori e maualuga atu le fua e ono aafia ai i le kanesa lenei o le Myeloma
