Ua toe sauni atu nei foi se tasi o alo o Samoa e lagolago le suega tupe faaletausaga a le faalapotopotoga o le Leukaemia and Blood Cancer NZ (LBC). O le afioga ia Tauiliili Petelo Li‘a, o se alii faasalalau i luga o leitio, ma o se alii pese foi, o le a aufaatasi atu i le faitau afe o isi tagatānuu o Niu Sila, i le selepooina lea o o latou lauao mo le Shave for a Cure (Selepoo le Lauao mo se Vaifofo) a le LBC.
I tausaga taitasi e lototetele ai tagata taitoatasi e mai lava i faauluuluga o matagaluega a le Malo, o kamupani ma faalapotopotoga eseese, o alii, tamaitai ma tamaiti, o aoga ma autaaalo, e selepoo o latou lauao mo ni seleni auā le sailia o se vaifofo mo le gasegase o le lukimia poo se kanesa e fesootai ma le toto. I se fua faatatau, e toaono tagatānuu Niu Sila i aso taitasi, e faailoa atu i ai ua aafia i latou i nei gasegase. E leai se fesoasoani tau seleni a le LBC e maua mai i le Malo, ma e faalagolago lenei faalapotopotoga i meaalofa tauofo mai le lautele faapea sailiga tupe, auā le sailia o se vaifofo, o le saunia ma le tuuina atu o ni faamatalaga e faatatau i le lukimia, aemaise se lagolagosua i sē ua aafia ma lona aiga.
O le lua lenei o tausaga ua auai ai Tauiliili i lenei faamoemoe ma e telē lona mautinoa o le a sili atu le tausaga lenei mo ia nai lo o le tausaga ua tea. “I le 2013 sa ou faatūina le $500 o le a ou aoina mai i le selepooina o lo‘u lauulu, ae uma ifo la‘u tauiviga e $600 na ou aoina. E telē lo‘u mautinoa ona o le lagolagosua sa ou mauaina i le tausaga ua tea, o lea ua ou faatūina ai le $750 mo le tausaga lenei”. O le vaiaso na tea nei na amata savalia ai e Tauiliili ia kamupani, o ona aiga ma ana uō, auā le lagolagoina o lona faamoemoe ma sa faafiafiaina lava o ia i le tali na ia mauaina.
“O le Aso Gafua na tea nei na faatoa mautu ai i lo‘u manatu, o le a ou toe faia le Shave for a Cure ma na amata ai foi i le aso lena la‘u sailiiliga sponsor. E oo ane i le Aso Tofi ua silia ma le $500 ua ofoina mai ae $350 na ou aoina. O se tulaga e lagona ai lava le lototele ma se lagona e fia taulāgalāga i mea lelei.”
O se tali e faagaeeina ai le tali a Tauiliili, ina ua fesiligia o ia poo le ā sona finagalo e tusa ai ma lona tulaga e lē gata i le aganuu, tapuaiga, galuega aemaise le tulaga faaletagata lava ia, e tusa ai ma le selepooina o lona lauao. “Poo ā ni mamalu o loo ia te au, ae na tusi le Aposetolo o Paulo, o le a leai so latou aogā pe a leai se alofa. E lē afaina foi ia te au upu ma tala e ono faia e tagata, ae e afaina ia te au pe afai ou te nofonofo e leai sa‘u mea e faia, ae o loo mafatia se tasi, aemaise lava se tamaitiiti, i lenei gasegase”.
O le Aso Toonai nei o le a faatinoina ai le selepooina o le lauao o Tauiliili, i le stage a le Radio531pi i le Pasifika Festival i Western Springs. O loo maua pea le avanoa e lagolagoina ai le afioga ia Tauiliili Petelo Li‘a e ala i le telefoni 0210503820 / 09 2662063 pe tagai ifo i tuatusi nei: www.shaveforeacure.org.nz ;
my.leukaemia.net.nz/petelo95
