“E taua le feiloai o fanau ma le toe fenofoai ona o le lē malamalama” Ale Vena
Ua mavae atu nisi o augatupulaga na tupuga mai i le tofa i le Igoamatua ia Ale Malu Fruean ma Fusipala Maryanne Easthope o Toamua Faleata, i le silia i le selau tausaga talu ai, ae faatoa faia se faatasiga toatele faapea a le aiga, ua malaga mai suli o alaala ma aumau i atunuu i fafo, aemaise o nisi o fanau a le aiga na fananau ma soifua ae i fafo ae o lea faatoa tulaueleele i Samoa na tupuga atu ai o latou matua.
O nisi o le aiga ua mau paolo i papalagi ma isi tagatanuu ma o se vaaiga matagofie lea i le faatasiga a le aiga, ona ua felanualanuai foliga ma lanu o nisi o suli ae o le tulaga taua o loo iai le toto Samoa ona o fanau na tupuga mai ia Ale Malu ma le tina o Fusipala Maryanne ua silia i le selau tausaga talu ona maliliu.
E iai pito afakasi o le aiga ma na molimauina lea i foliga o suli i le aulelei ma le papae momosi o tino ma foliga, peitai o le agaga autu o le faatasiga poo le reunion a le aiga, ia mafai ona feiloai fanau ma iloa e le isi le isi aemaise o le atunuu na tupuga atu ai o latou matua. Na faaalia e le Sa‘o o le aiga le tofa Ale Vena Ale Fruean, o le isi sili ona aoga ma taua o nei faatasiga o le taofia lea o le toe fenofoai o fanau.
“E taua le feiloai o fanau ma le toe fenofoai ona o le le malamalama o le isi i le isi, ae e pei lava ona saunoa Patele i le misasa na tatala ai lenei faamoemoe e iai isi a fai atu i ai, ae fai mai pe fai e ni fanau ni aiga”, na soisoi Ale ma saunoa mai i le tusitala ae o loo afifi ai se feau taua mo le mafaufau loloto i ai o soo se Samoa ua leva tausaga ua le toe feiloai ma nai aiga sa ola ma tupuga ae ai.
E taua foi nei ituaiga o mafutaga aua ua mafai ona faatino e nisi aiga ua toe feiloai ai ma nisi ua leva aso ma tausaga o nofo valavala.
O nisi foi o suli o aiga e tiga lava ona alaala i Samoa ae ua le toe maua se feiloaiga e pei ona faaalia e se tasi o matai, ona ua iai le lagona ua fai lava le aiga o le tagata ia ma saili manuia o fanau ona galo ai lea o le fatu taua i le olaga o soo se Samoa o le osi aiga ma iloa tupuaga o matua.
E tasi le vaiaso sa faagasolo ai le mafutaga tuufaatasi a suli o Ale Malu ma Fusipala, ma e tele polokalame sa faatino ai, ae o le polokalame sili ona lolofi i ai o le ava malosi ma le taumafa aua e pei o le sae lava lea o faigamea faapea i ni faatasiga a aiga, o le taimi o le laualo ma le avamalosi e maua ai le fiafia ma le ata ma talatalanoa e toe faamanatu aso ua mavae ma mea na tutupu ai a o laiti ma talavou le soifuaga o nisi ua faasolo ina matutua ae o lea faatoa toe fevaaiai ma feiloai.
E mataina foi lea faatasiga ona o le faletua o se tasi o tamalii o le atunuu sa avea ma uluai tagata Pasefika e avea ma faipule muamua o le Palemene o Niu Sila le afioga Taito Phillip Field le faletua o Maxine na tupuga mai i le aiga o Ale Malu ma Fusipala Easthope.
E lei maua se feiloaiga i le faletua ae sa vaaia lona laufofoga fiafia ua maua le avanoa e mafuta faatasi ai ma ona aiga i Samoa ma isi atunuu.
Na fetaui tonu le faatasiga a le aiga ma le vaiaso o le Teuila na maimoa ai i polokalame eseese, ma o se isi lea taua tele o le Teuila e tuu tonu i ai faatasiga faapea a aiga e maua ai le avanoa e malaga mai i le atunuu e feiloai i aiga ma faamaimoa fanau na ola i fafo i vaega o tu ma aganuu faa-Samoa.
