Se‘i faaiu o le tausaga: G-Mana Wholesale Autos & Henderson Cars

O le fuata ma lona lou, o le aso foi ma le mea e tupu ai, e tuu fesili foi le mafaufau poo ā ni mea o lea a tutupu i le tausaga fou, auā ua tele galuega lelei ua faamanuiaina ai le toatele o tagata o le Pasefika i le tautua a nisi o fale faatau taavale iloga i totonu o le atunuu, e pei o le G-Mana faapea le auaunaga a le Henderson Cars. Auā e fai o meaalofa tupe mo tagata sa faatauina a latou taavale i masina taitasi ae o le faasoa foi o le manuia mo Ekalesia ma faalapotopotoga o loo fia maua le fesoasoani.

Faaiu galuega a le G-Mana i lona afioaga o Vailele

O le Aso Toonai ua mavae na oloa luuluu ai le toatele o tagata i faamanuiaga faaiu a le afioga i le Aloalii ia Galumalemana Tai Galumalemana ma lana faletaavale e ala lea i le Se‘i tele sa faia mo tagata uma sa faatauina o latou sa i le masina mulimuli o lenei tausaga.

E $20,000.00 sa faaaluina mo i latou e to‘a 42 sa faia ai le Se‘i i faailoga e 10 e tai $500.00, o faailoga e 5 ta‘i $1,000.00 ma le manumalo e $10,000.00.

O le mau tauave a le afioga i le Aloalii, o manuia ua maua e lana auaunaga o le a toe faasafua mo ona tagata aemaise o le Pasefika.

Na amatamea le polokalame i le taulaga faafetai sa tulai ai le afioga ia Patele Michael Endermann e fai ma ositaulaga i lea aso. Ona sosoo lea ma le saunoaga a le tofa ia Fili e faafeiloai le mamalu o le atunuu sa auai.

Ua matagofie le faamoemoe ina ua suifefiloi le manogi o le lolo i tagata mai Tonga faapea foi ma tagata Samoa, aemaise ai o le faatasi atu o le Konesula Aoao o Samoa ia Faolotoi Reupena Pogi, le afioga i le alii Faipule, tofa ia Su‘a William Sio, o le tuaa o le alii fusu lauiloa ia Lupesoliai Laauli Joseph Parker le faletua ia Letele Salavao Parker, faapea nisi o sui o le afioaga o Vailele sa faaautu i ai lenei faamoemoe. Na sosoo ma le taumafataga na saunia e le G-Mana e talitali ai le taimi e vili ai le masini poo ai o le a faamanuiaina i lenei Kirisimasi.

O pesepesega malu a le faili a le G-Mana Band ma faafiafiaga a le autalavou mai le Ekalesia Katoliko Onehunga faapea le tausala, sa faanofo lelei ai le popole o loto o tagata i le $10,000.00.

O le susuga i le malu o le malo ia Lisiti Ah Siu ma le Miss Samoa NZ ia Christina Taefu na viliina le masini o loo iai suafa o i latou sa faatauina taavale.

Ma o i latou sa faamanuiaina i le $500 o Lalotoga Saua, Sione Tavita, Albert Ronald Vatau, Dirithy Pesamino, Lafililo Junior Komiti, Lupeni Langi, Taamilo Ali, Sioeli Manisela, Seini Katikati, ma Teresia Hewitt.

O faailoga ta‘i $1,000.00 na faamanuiaina ai Erin Marie Petelo, Kalepo Faumuina, Asomaliu Nonu, Aira Mataina Timu, ma Marine Paulo.

O le faailoga $10,000.00 na mauaina e Numia Toloa.

Na faaiu le faamoemoe i le saunoaga faafetai a le afioga i le Konesula Aoao o Samoa e momoli ai le agaga fiafia ma le loto faafetai i le afioga ia Galumalemana Tai Galumalemana, faapea le tautua a le G-Mana e tusa ai ma galuega lelei sa faatinoina mo le atunuu ma tagata Pasifika i lenei tausaga.

E lē galo le alofa o Shiu i tagata Pasifika

O le tasi lea auaunaga e lē mafai ona latou tuulafoaina tagata Pasifika, o le tautua a le susuga ia Shiu Singh ma le Henderson Cars, o loo maitauina foi e le toatele lona tu malosi e lagolago i soo se galuega faatino i totonu o le komuniti Samoa faapea ma Tonga, ua lē gata i tagata faatau taavale ae ua oo foi i totonu o Ekalesia.

O le Aso Toonai ua mavae na tumutumu ai foi le lotoā lenei i Takanini i le mamalu o le atunuu na lolofi atu e molimau le Se‘i a lenei auaunaga poo ai o le a sola ma le faailoga e $10,000.00 o le manumalo.

E $20,000.00 sa faaagaga mo lenei Se‘i tele i le faaiuga o le tausaga. Ma ua militino faatasi ai tagata Tonga, Fiti faapea ma Samoa i lenei faamoemoe. Sasala faasolo atoa le manogi o le BBQ na tali ai le sua a le auvalaaulia faapea musika tu‘itu‘i a le faili mai Tonga sa vaavaalua ma le DJ a le tofa ia Seumanu Francis Ioane na salani ai lagona o le au faatau taavale. Na saunoa le tofa ia Seumanu e faafeiloai le mamalu o le atunuu ona amata lea o le Se‘i, o lenei faamoemoe sa faasalalau tuusa‘o i luga o le polokalame a Savea ma le tanoa ava i le Radio Samoa.

O ē na manumalo i le ta‘i $500.00 o Saviga Taumata, Kinikinilau & Mele Uasike, Jason Vaifou, Simione Taufateau, Tevita Kioa, Malakai & Manuel, Tavalea Mafi, Daniel Apineru, Siloimata Lang Shiu, ma Manu Vanisi. O ē na manumalo i le ta‘i $1000.00 o Tamasoalii Kelesoma, Pat Pisona, Pelise Tuaoi, Tuvaoiletogo, Eneliko Kanesi.

O lē na manumalo i le $10,000.00 o Siu Tafa, ma o se fiafiaga sili mo i latou sa faamanuiaina i lea aso ina ua maua ni faamanuiaga mo le Kirisimasi ua lē gata ia Samoa a o uso mai Tonga.