Sefulu tausaga o le tautua a le La o Samoa i Aotearoa

Le ausiva a le La o Samoa i le Pasifika Festival 2018
Le ausiva a le La o Samoa i le Pasifika Festival 2018

O le ausiva logologoa o le La o Samoa na amata mai e le faletua ia Sia Su’a Aoina Vaaulu Aoina ma lana fanau faapea ma nisi o tamaitai o lona aiga. Na o le toatolu tamaitai sa amataina lenei ausiva mai totonu o ekalesia e ala lea i le aoina o siva a autalavou ma aoga aso asa. Peitai ane ua tupu le taleni ma ua faatuputeleina foi le oa o manatu e faufau ai taga o siva e faatinoina ai polokalame pe a oo ina valaaulia le ausiva e auai i se faamoemoe, aemaise ai o le faasoaina lea o le taleni i fanau talavou tamaitai ina ia latou iloa ma malamalama i le faiga o taga o siva.

O le tausaga 2007 na sui ai le isi laasaga fou o le au siva e ala lea i le aoaoina o siva faaSamoa e faaaoga ai pese Samoa e pei ona masani ai le atunuu, ma o le taimi foi lea ua aloaia ai le tatalaina o le ausiva lenei o le La o Samoa i soo se faafiafiaga i polokalame faaSamoa, o ekalesia, ma isi lava valaaulia e pei ona manaomia ai le ausiva lenei.

O le tausaga 2009 na uluai tatalaina ai le latou dvd poo le ata ua tuufaatasia uma ai siva eseese sa aoina e le faletua ia Sia Su’a Aoina Vaaulu Aoina ma lona alo tamaitai ia Lana Fuaina Margaret Tupu Aoina, lea sa faataunuuina i Malaeola. O le tausaga 2011 na faalauiloa ai le isi a latou dvd lona lua e ala i taumafaiga lava o le La o Samoa e pei ona iai ana faafiafiaga eseese. O le susuga ia Titiula Tuigamala sa ia tuufaatasia ia ata e lua o le La o Samoa.

Le ausiva a le La o Samoa i se tasi o a latou faafiafiaaga i le Pasifika Festival 2017
Le ausiva a le La o Samoa i se tasi o a latou faafiafiaaga i le Pasifika Festival 2017

Ua logologoa ma aave tala o le ausiva lenei ma ua molimauina foi e le toatele o le atunuu le matagofie o taumafaiga o alo ma fanau tamaitai talavou o loo auai i totonu o lenei ausiva. O le manulauti poo le anavatau o loo fai ma taimuaga o lenei ausiva, ia faamuamua lau aganuu faaaloalo, ma o le taiala lava lea o loo fai ma alavaa a le La o Samoa i soo sana faafiafiaga e valaaulia ai.

Ua tele polokalame eseese ua faafiafia ai le La o Samoa e pei o le Polyfest, Pasifika Festival, o le Teuila i Samoa aemaise o ni faaipoipoga, aso fanau ma ni polokalame a ekalesia. Sa faafiafia foi i le tauvaga Miss Samoa Niu Sila i le tausaga 2010.

E toasefulu fa tamaitai talavou o loo auai i le taimi nei i le ausiva, i lalo o le faamalumaluga a le faletua ia Sia Su’a Aoina. Pei ona saunoa le faletua ia Sia, ua tupu ma ola le ausiva, ua faalauteleina foi le malamalama o le fanau e faalautele ai le taleni i taga eseese e faatinoina ai le siva. Ma ua ia vaaia foi le suiga tele ma le saoasaoa o tapenaga a le La o Samoa i le taimi nei e ala ia latou faafiafiaga suifefiloi. Ma e lagona ai lava lona faafetai i le Atua ona o meaalofa ma taleni ua faaoaina ai le aiga aemaise le fanau, o lea ua fesoasoani ma faasoa atu i fanau tamaitai talavou o Samoa aemaise ai o aiga. I le taimi nei ua le o toe taua le ausiva o se ausiva a le aiga ae ua taua lava o le ausiva a Samoa ona o lea ua ofi mai ai nisi o alo ma tama fanau tamaitai o Samoa, pau le vaega o loo faaaogaina ua na o le igoa o le La o Samoa.

O le Aso Faraile o loo loma nei o loo iai se faamoemoega tele o le La o Samoa, e faamanatuina ai le atoaga o lona 10 tausaga ma le tatalaina o lana dvd lona tolu lea ua fuafua e faia i le Maota o Samoa i Magele. Ma o le a faafiafia ai foi le La o Samoa ma le Tatau dance group aua lava le faamanatuina o lona aso fanau. O alo o le susuga i le faafeagaiga ia Rev Fomai Lafaialii ma le faletua ia Rasela Lafaialii, o Siatua Junior Demarco Lafaialii ma le Frontline Production sa tuufaatasia le ata lona tolu lenei o le La o Samoa.

O nisi vaega o lenei ata sa pueina mai lea i totonu o le afioaga o Lepea ma isi vaega o laufanua o Samoa ma faaiuina mai ai i laufanua o Aotearoa.

Le ausiva a le La o Samoa i le Teuila Festival o le 2016
Le ausiva a le La o Samoa i le Teuila Festival o le 2016