Ua atoa i le tausaga lenei le 10 o tausaga talu ona faavae mai se Fesoasoani i Samoa e ta‘ua o le Aunty Lanu’s fund.
O se fesoasoani lea ua vaaia ai se koneseti ma se ‘aiga e faatautaia i tausaga taitasi e saili seleni ai aiga ma le fanau a Aunty Lanu poo Lanuola Keil, mo togafitiga ma siaki o le gasegase o le suka.
O le tina lenei na maliu i le sili laititi atu ma le 10 tausaga talu ai ona o le gasegase o le suka ma o le mafuaaga lea o le a‘e o se tofa i le aiga, aemaise o ona alo ina ia saili se auala e faaolaola ai pea le suafa o le tina e ala i ana fesoasoani i le atunuu ae ua faaauala atu loa i le sailiga o togafitiga ma le unai o le faalauiloa o puipuiga o tagata Samoa mai i lenei gasegase matautia.
O le alo matua o Lanuola ma lona alii o William Keil, o le susuga ia Hans Joachim (Joe Keil), o ia lea ma le fanau a Lanuola ia William Keil, o loo faatautaia lenei auala saili tupe mo fesoasoani i tausaga taitasi.
O le tausaga lenei ua faapea foi ona tumutumu mai ai tagata faafiafia mai i fafo, faapea Samoa nei aemaise o aiga ma uo ma le lautele o le atunuu e opogi lenei faamoemoe.
O se taumafataga tele na faatautaia i le vaiaso ua tuanai ma se faaaliga o taleni a tagata faafiafia na aoina ai le seleni mo lea faamoemoe.
O le aufaafiafia mai i Las Vegas ma Niu Sila, o Cindy of Samoa ma faafāfine Samoa na matuā masii mai i Apia mo lenei faamoemoe e faafiafia ai.
Ta‘ua e nisi sa iai i le fiafia o lea po, e tusa ma le 110 afe kilo le mamafa na faaopoopo i le uta a lea aufaafiafia ina ua tulaueleele i Samoa ona o teuga ua lē masino, e fai o le iila a o le mamafa na matuā aumai lava i Apia mo faafiafiaga o lea po.
E lē gata i lea o se alii ua ia faia faataitaiga o siva ma pese a le alii pese lauiloa ua maliu o Elvis Presley na aumai foi i Samoa nei mo lea fiafia.
O le tau o le laulau e tasi e $1,800 tala ma e oo atu i le toaono i le toavalu i latou na mafai ona nofoia laulau taitasi.
O taumafataga ma meainu na mafai ona maua mai i lea seleni aemaise ai ma le faafiafiaga tele lea.
E pei ona ta‘ua o le 10 ai lenei o tausaga o lenei taumafaiga ma ua tele fesoasoani e ala i tui, o fualaau ma isi mau manaoga mo le togafitiga ma le siakiina o le gasegase o le suka ua faatau mai i nei foai i tausaga uma.
Ua faatau ai foi ma se taavale o le ituaiga o le van mo le Asosi o le Gasegase o le Suka i Samoa ona o lenei lava fesoasoani a alo o Aunty Lanu.
Mo i latou na soifua ane i le vaitaimi o le 1970 seia oo i le 1990, aemaise i le talafatai o le taulaga, o le a manatua lenei suafa ona o le fale keke muamua lava lea na faatuina i Samoa, o le fale keke o le loomatua lenei ma o lona igoa lava lea e iloa ai e le lautele o le atunuu o Aunty Lanu.
O ana fasi keke, o pai ma isi taumafa suamalie, ia na mafai ona momoli solo i aoga laiti ma aoga maualuluga i le atunuu. Atonu o lona feagai ai ma lenei atina‘e na aafia ai lava i lenei gasegase, ae e oo mai i le taimi nei, o loo olaola pea le suafa o lea tina e ui ina ua maliu ae ua faaauala mai la i togafitiga ma le unaiga o puipuiga o le gasegase o le suka ae ua le o toe iai se fale keke e pei ona sa silafia ai lenei tina.
