E tele atu tagi a sui tauva o le HRPP faasaga i isi sui o le HRPP, nai lo tagi faasaga i sui na manumalo o le Tautua Samoa party lea e na o le taitai, le afioga Vaai Papu Vailupe o loo tuuaia i faatosina solitulafono.
Ae o tagi e sefulu ua faaulu e aofia ai mataupu faasaga i minisita fou e toalua faato‘ā filifilia e o la itumalo i le tofi faipule o le Palemene, ma le minisita ua toe filifilia, Faumuina Liuga ona toatolu ai lea o minisita o le kapeneta fou ua faasaga i ai tagi o le palota na faia i le tau amataga o le masina nei o Mati.
O minisita e aofia ai Manu‘alesagalala Enokati Posala o se tasi o faipule o nofoa e lua o le itumalo o Safata, afioga Magele Mauiliu Magele, o le isi o faipule o nofoa e lua o Faasaleleaga Numera Tasi, ma le afioga Faumuina Tiatia Liuga.
E lē gata ina faasaga ni tagi o le palota i ia minisita e toatolu, ae faapea foi se tagi faasaga i le Sui Fofoga Fetalai fou, le tofa Agafili Patisela Eteuati mai le itumalo o Palauli i Sisifo.
O le taitai foi o le Tautua Samoa afioga i le Aloalii, Vaai Papu Vailupe, o loo aafia i se tagi o tuuaiga o faatosina solitulafono o le palota.
O le ta o le 5 o le afiafi o le Aso Lulu 23 o Mati 2011, na tapunia ai le avanoa i totonu o le fitu aso, amata mai i le aso na fofogaina ai le faaiuga aloaia o le palota e faaulu ai tagi.
E sefulu mataupu ua faailoa mai e le Pule Sili o le Matagaluega o Faamasinoga, tofa Masinalupe Tusipa Masinalupe, na faatoai atu.
O le Aso Lua 22 o Mati e lua tagi na faaulu ai, ae o le isi valu na faaulu uma i le aso mulimuli. Faaalia e le Pule Sili, o le tele o tagi o loo faasaga i tuuaiga o faiga faaalatua i faatosina e aafia ai le tuuina atu o tupe ma taumafa ma le ava malosi i tagata palota, ae o isi tagi e lua o loo faasaga i le Komesina o Faigapalota ma lona ofisa e mafua i ni mataupu e pei o aiaiga o le tolu tausaga e nofomau ai i Samoa se tagatānuu o Samoa ona faato‘ā agavaa lea ona avea ma sui tauva.
O se isi mataupu e faatatau i le aiaiga o le monotaga lea e faamaonia e se tofi pulenuu.
“O mataupu nei a mae‘a ona faatulaga lelei faamaumauga i pepa tusitusia ua faaoo mai e sui o loo tagi, ona momoli lea i sui o loo aafia i tuuaiga poo i latou o loo faasaga i ai se tagi mo le faasalalauina i nusipepa”.
O le faamalamalamaga lea a le tofa Masinalupe Tusipa, o le isi laasaga o loo tapena i ai le ofisa o faamasinoga.
O tagi e sefulu ua faaulu ma o le a valaauina i le ogatotonu o le masina fou o Aperila e aofia ai le tagi a Gafoaleata Tufuga o se sui tauva o le HRPP, faasaga i le afioga Vaai Papu Vailupe.
O le tagi a Loau Solamalemalo Keneti Sio o se sui tauva o le HRPP sa avea ma faipule faasaga i le afioga Tuisa Tasi Patea mai le itumalo o Sagaga le Falefa.
O le sui tauva o le HRPP o Asiata Wairaki mai le itumalo o Satupaitea faasaga i le afioga Tavu‘i na manumalo, Taito Aliifaalogo Faitele o le isi sui tauva o le HRPP faasaga i le afioga Tialavea Tionisio Seigafolava mai le itumalo o Vaa o Fonoti.
O Saunoamaalii Finafinau o le sui o le HRPP faasaga ia Manu‘alesagalala Enokati Posala, o le minisita o Galuega tetele ma felauaiga. Moefaauo Lufilufi sa avea ma faipule o Anoamaa i Sasae faasaga i le sui manumalo o Ala‘iasa Filipo Schwarts, Tagaloa Pita o le sui tauva o le Tautua Samoa faasaga ia Faumuina Tiatia Liuga le minisita fou o le Tupe.
O Pauli Pipi Tevita o le sui tauva o le Tautua Samoa faasaga i le sui manumalo le afioga Magele Mauiliu Magele le minisita fou o Aoga Taaloga ma Aganuu, Taua Faraimo o le sui tauva o le Tautua Samoa faasaga ia Agafili Patisela Eteuati o le sui o le HRPP na manumalo i le nofoa o Palauli i Sisifo, ma Fuataga Kasimani Lautusi o le sui tauva tutoatasi o lana tagi faasaga i le sa avea ma minisita o Faatoaga ma faiga faiva na toe manumalo i le faigapalota, le afioga Seuala Taua Kitiona Seuala.
E na o le taitai o le Tautua Samoa o loo aafia i se tagi o le faiga palota, ae mo le HRPP e toaiva faipule na filifilia i le palota o loo aafia i tagi o le palota.
