O le vaiaso ua tea na faamamalu ai e le Malo a le National le vaega lua o lana tulafono ua suia ai aiaiga o mafuaaga e agavaa ai le tagata mo le fesoasoani tau tupe mo i latou o loo maua i ma‘i o le tino ma ua lē mafai ona faigaluega.
O le uiga o ia suiga o soo se isi o loo maua i ma‘i o le tino ma ua lē mafai ona faigaluega – ma o loo agavaa mo le fesoasoani tau tupe a le Malo ua ta‘ua o le ‘Sickness Benefit’ – o le a faamalosia nei le unaia o outou e le Malo e o e saili ni galuega e faigaluega ai.
O le faatinoga o ia suiga e amata i le taimi muamua e fai ai sau talosaga mo le penefiti.
E muamua ona suesue lelei oe e le matagaluega a le WINZ poo oe o se tagata o loo avanoa, agavaa, ma maua le malosi e faigaluega i se galuega mo le 15 agai i le 29 itula i le vaiaso.
E fesiligia ma suesue lelei oe ma lau fomai i le atoaga o le 4 vaiaso talu ona e maua lea penefiti.
E faapena foi ona toe fesiligia oe ma suesue lau fomai i le atoaga o le 8 vaiaso.
E mae‘a loa le fesiligia o oe i le atoaga o le 4 ma le 8 vaiaso, ona sosoo loa lea ma le suesuega o oe i le atoaga o le ta‘i 13 vaiaso seia atoa le 12 masina.
O le atoaga o le 12 masina e matuā toe fesiligia oe ma lau fomai pe mafua aisea le mea ua lē mafai ai ona e saili se galuega e te faigaluega ai.
Afai lava e fesiligia oe ma lau fomai i le 4, 8 ma le ta‘i 13 vaiaso, faapea foi le atoaga o le 12 masina, a o tumau pea lou lē mafai ona e faigaluega, e mafai e le matagaluega ona toe tapa se finagalo o se isi fomai mo sana fautuaga pe tatau ona e maua pea le penefiti mo tagata ma‘i.
Afai foi e lē talitonuina lau fomai i soo se taimi e mafai e le matagaluega a le Malo ona tapa se finagalo o se fomai a le Malo poo tatau pea ona e maua le fesoasoani tau penefiti a le Malo.
E 59,000 le aofai o latou o loo maua le Sickness Benefit poo lea fesoasoani tau penefiti.
E latalata i le 10,000 le aofai o latou o loo maua lea penefiti ua talitonu le Malo e tatau ona o e faigaluega.
O le a faaopoopo i ai le 3,000 i tausaga taitasi o le fuainumera o latou e tatau ona unai e le Malo e o e saili ni galuega mai le 59,000 o tagata o loo maua le fesoasoani tau tupe ona o se ma‘i o le tino.
O latou nei o le a faapena ona unai e le Malo ina ia o e sue ni galuega. Afai e tetee e se isi se ofo mo se galuega o le a faapena ona taofi le latou penefiti. Afai foi e lē o e saili ni galuega ma fai ni ‘interviews’ e ono afaina ai foi le maua o lenei penefiti.
O latou nei e talitonu le Malo e tatau ona o foi e faatino ni polokalame tau a‘oa‘oga, pe galulue ina ia maua ai le ‘work experience’.
O le faaletonu o lea faiga faavae a le Malo ona o le taimi nei o loo tumau i le 160,000 le fuainumera o le aofai o tagata ua leai ni galuega, ma e pito sili lava ona maualuga le fuainumera o tagata Maori ma tagata Pasefika.
E lē gata i lea e pito i sili lava ona maualuga le fuainumera o le aofai o le autalavou i le va o le 19 agai i le 24 tausaga le matutua e lē o maua ni galuega.
O le fesili e ao ona tatou fetufaa‘i ai – e lelei lea faiga o le unai o tagata o loo mamai e o e saili ni galuega pe afai o loo faigata ona maua ni galuega? E lelei le unai o i latou o loo mamai e o e sue ni galuega ma faamata‘u mai, a lē o e saili ni galuega o le a taofi le penefiti?
O nei suiga e mafua mai lava ona ua tele le tupe a le Malo ua alu talu mai le faapa‘ū o lafoga totogi a le aufaipisinisi tetele ma latou o loo maualuga o latou tupe maua.
E ui lava ua siitia le GST i le 15 pasene ua iai nei, ma taugata ai le tau o le soifuaga, ae ua nofo aitalafu le atunuu i le $300 miliona i le vaiaso, talu lava le maualuga o tupe ua lē toe maua e le Malo talu mai le faapa‘ū o lafoga mo le aufaipisinisi tetele ma tagata mauoa.
O se tasi lenei o mataupu tāua mo le faigapalota o loo loma nei i le aso 26 o Novema 2011. O se mea tatau le fesoasoani o le Malo ia i latou o loo vaivai le tamaoaiga? O se mea tatau le fesoasoani o le Malo ia i latou o loo maua i ma‘i o le tino ma lē mafai ona faigaluega?
O se mea tatau ona fesoasoani le Malo ia i latou ua vāea mai galuega ma ua lē toe maua ni galuega? O ai e tatau ona maua fesoasoani tau tupe mai le Malo?
O le isi mataupu tāua, o se mea tatau ona toe sii i luga lafoga totogi a le aufaipisinisi tetele? Sa masani ona latou totogiina le 39 pasene i polofiti maua, ona toe faapa‘ū mai lea i le 33 pasene, sosoo ai ma le toe faapa‘ū i le 30 pasene.
O lea foi o loo fuafua le Malo a le National ina ia toe faapa‘ū i le 28 pasene, ae o loo finau mai foi le vaega faaupufai a le ACT e tatau ona toe faapa‘ū le lafoga totogi a le aufaipisinisi tetele i le 25 poo le 20 pasene.
Afai e vaivai tupe maua a le Malo, o le a faapena lava ona lē toe faatino e le Malo fesoasoani sa masani ona maua e le Atunuu lautele. O le ā sou finagalo i ai?
