O lenei lava le vaega oloo fesiligia pea, poo le a lava le autu o le faamanuiaina ma le lē faamanuiaina o aoaoga a le fanau. O nisi o manatu, poo le a lava le ituaiga siosiomiaga e aoaoina ai le fanau, e tatau lava ona agai i luma ma faamanuiaina. Peitai i ni isi o mau faamaumauina, e tele lava vaega e mafua ai le lē faamanuiaina ma le faamanuiaina o aoaoga a le fanau.
Ua mautinoa le taua o le siosiomiaga e aoaoina ai le fanau. Ia mautinoa le amanaia ma le faatauaina ma le taliaina o le fanau ma lo latou auai ma o latou aiga, aemaise o saofaiga eseese latou te auai i le fuafuaina, faatinoina ma le iloiloina o le fanau.
E fiafia le fanau e aoaoina pe afai latou te mautinoa le amanaia o latou ma maua ni avanoa e atinaeina ai ni faigapaaga lelei ma isi tamaiti aoga, aemaise foi faiaoga.
O le saunia o ni avanoa e auai le fanau i lo latou aoaoga, ina ia suesue ai lava latou ma aoaoina e fetuutuunai o latou mafaufau e sailiili ai i ni tali e fia maua latou te foia ai ni o latou faafitauli, poo le faalauteleina o lo latou aoaoga, ina ia mafaufau loloto ai ma fetuutuunai o latou mafaufau e faaaoga ai lo latou iloa ma tomai oloo iai, o ni avanoa lelei tele ia e saunia ai le fanau, mo le isi laasaga o lo latou aoaoga.
O se tasi lea tomai taua e manaomia, o le iloa lea e le tamaitiiti ona fesootai lona tomai poo lona iloa oloo iai, ma lona tomai fou e faatino ai ni ana galuega.
O se faiaoga mataalia, o se faiaoga lea e faamalosia le fanau ina ia iai so latou sao i lo latou aoaoina. Ae le gata i lea, o le saunia lea o ni auala talafeagai e atinae ai ni faigapaaga mafanafana ma matua, aiga, aemaise saofaiga eseese e auai atu i ai le fanau.
E pei ona ta‘ua i nisi o tusitusiga, ua faamalosia e le tamaitai minisita o aoga le gagana, tu ma aga ma le faasinomaga o le tamaitiiti.
O le talitonuga, afai e te malamalama lelei ia te oe ma faataua lau gagana, tu ma aga ma lou faasinomaga, o le a mafai foi ona e matua malamalama lelei ma faataua, amanaia, ma e faaaloalo i isi tagata.
Afai o oe o le faiaoga e te malamalama ma e talitonu i le taua o lau gagana, tu ma aganuu, ma lou faasinomaga, o le a faapea foi ona e malamalama i tamaiti o lau vasega e eseese gagana, tu ma aganuu ma o latou faasinomaga.
O le a faapea foi ona tinou le faiaoga e saunia ni auala, alagaoa, ma ni faatinoga, e talafeagai lelei ma manaoga o ia alo ma fanau i lana vasega, ina ia latou maua ni avanoa lelei mo le agai i luma o a latou aoaoga.
Ua tele le fesuiaiga ma le vaai mamao mo tagata aoaoina o lenei vaitau, ua faapea foi ona tatau ona tele le silasila mo auala auā le agai i luma ma le faaleleia o avanoa mo alo ma fanau mo le lumanai.
E manaomia ni avanoa e faalautele ai le tomai o le fanau e fetuutuunai ai o latou mafaufau ina ia mafai ona latou faia ni faiga filifiliga tatau ma le talafeagai e faaauau ai o latou ola suesue, fesootai i ni auala talafeagai ma isi, faasoa ma talia faasoa a isi, ia lelei fesootaiga ma tagata latou te fesootai i ai, ia mautinoa ni auala e mafai ona felagolagomai ai ma isi ina ia maua le ola saogalemu ma le soifua maloloina, ma ia lagona le fiafia e auai i soo se siosiomiaga.
Tatou te maua nei taunuuga, pe a tatou maua le agaga o le faamalosiau, tagai i vaega uma o manaoga ma le atinaega o le fanau, ia maua ni faigapaaga mafanafana ma aiga ma tagata lautele, ma ia lelei le va fealoai ma isi.
Afai tatou te talia fesili ia a le tamaiti: O e lagona mai au? E te tuu mai ia te au ia ou saoloto? E talafeagai lenei siosiomiaga mo au? O e lagona mai au? E te talia au ma lou aiga? – o lona uiga, o oe o le faiaoga saunia lelei mo le tapenaina o lumanai o fanau, ina ia fiafia e aoaoina.
Manuia tele le feagai ai ma galuega o lenei vaiaso.
