O le faigamalo na filifilia i le mae‘a o le faigapalota tele o le tausaga e 2006, na latou pasia le faamatuu atu o le 20 eka o eleele o le Malo i Tafaigata i le nofoaga ua iai ma le fanua maliu i lea vaega o le talafatai i Sisifo o Apia, e fausia ai le falemaliu fou e faaliu efuefu ai tino maliliu ma o se atinae a le tofa i le matua le fetalaiga Pa‘u Sefo Pa‘u, ua silafia e le toatele i lea atinae poo se pisinisi foi.
Talu mai lena taimi e lei fausia le faamoemoe, ae na faatoa amata faatino i le tausaga e 2011 a o lumanai le faigapalota tele i lena tausaga. Na faaalia e le tofa Pa‘u na alualu ma taatia le galuega ona o le tulaga tau tupe, ae o le Aso Toonai na tea nei, 4 o Me 2013, na tatala aloaia ai ina ua mae‘a.
E tusa ma le tausaga atoa poo le 12 masina na faagaioi ai le galuega o le maota maliu, ma e lē gata ina iai ma le Malumalu mo sauniga lotu, ae o le vaega e tuu ai tino maliu e sauni ai mo taimi e faia ai toe sauniga i le tanumia i tuugamau, atoa ai ma le vaega e faaliu efufeu ai pe afai o le manaoga lea o se aiga o se tasi ua valaauina e le Matai sili i le lagi.
I le saunoaga autū o le aso a le taitai o le Malo le afioga i le Palemia Susuga Tuilaepa Lupesoliai Sailele Malielegaoi, na ia faafetaia ai le fetalaiga Pa‘u ma le tausi i le finau i mea lelei e pei ona iai se uluai maota maliu e faaliu efuefu ai tino oi latou ua maliliu i Samoa. O le itu tāua e pei ona saunoa le alii Palemia ona o se faamāmā avega mo le Malo mo nai tagata tafafao e malaga i le atunuu ae maliliu ai, ae faigata i o latou aiga ona toe avatu o latou tino ona o le taugata, ae e mananao e faaliu efuefu.
O le isi faamāmā avega mo le Malo ona o taimi e ono tutupu ai ni faalavelave faafuasei e toatele ni soifua e maumau ai, e mafai ona faaaogā i ai lea auaunaga pe a iai ni faaletonu i nofoaga malulu poo aisa e tuu ai ni tino maliliu se tele.
O se isi itu tāua e pei ona faaalia e se tasi o tamalii sa auai i le tatalaga aloaia o lea auaunaga fou, o nisi o aiga o le atunuu e vaapiapi eleele poo fanua o nonofo ai, ma o le faasaoina o eleele mo tagata e nonofo ai, o le isi lea auala lelei e faaaogā o le faaliu efuefu. O le auaunaga lenei ua iai se masini o se ogaumu e faatino ai le auaunaga ma o le tau atoa e $650,000NZ.
E lē taugofie e pei ona saunoa le alii pule, ma a faaopoopo i ai ma le tau o le fale atoa ma isi ona totoga ona oo lava lea o le tau atoa i ni fuainumela tetele ae e lei ma‘oti mai le aofaiga tonu i le tala o le galuega na saunoa i ai le tofa Pa‘u Sefo.
Fanua maliu i Tafaigata ia pei o fanua maliu i Niu Sila
I le saunoaga a le Palemia na ia faailoa ai le fuafuaga a le Malo i le tuuina atu o se vaega eleele tele i Tafaigata ma Vailele e avea ma fanua maliu ona ua lē ofi nisi o fanua tanu o loo i le taulaga e pei o Magiagi ma Tufuiopa. O le fuafuaina o le fanuatanu i Tafaigata sa ave ai le faatonuga i le matagaluega o Punaoa faalenatura ma siosiomaga o loo vaaia fanuatanu, ina ia tau o ulu o i latou ua maliliu e iai maa poo le headstone ae aua le simaina. O se faiga na saunoa le alii Palemia e mafai ona matagofie ai i le silasila ma le vaai ma a oo foi ina faamamā e moa atoa le fanua ae na o le vaega lava o iai maa e iloa ai tuugamau taitasi.
Peitai ua iai nisi o fanua maliu ua faasima, a o nisi foi fanua ua felavasai solo ma ua lē u faatasi ulu i se vaega e tasi ae ua feuai ulu ma vae. Sa malaga le alii Palemia ma silasila i le fanuatanu i Magele i Niu Sila ma ia maua ai le auala tonu e faia ai fanuatanu fou ona o lana saunoaga e ese le matagofie o ia fanuamaliu, i le taooto faatasi mai, o i latou o loo tatanu ai ae o le vaega atoa e gatasi le mutia ma matagofie laau toto ma e fia o iai tagata e tafafao ai.
O le a toe silasila le Malo e pei ona saunoa Tuilaepa i le faiga tonu o fanuamaliu i Tafaigata ma Vailele ina ia pei o fanuatanu i Niu Sila.
