Ua mae‘a ona tuuina atu le foai tupe e $70,000 tala Samoa a le Pacific Ezy Money Transfer i le taitaifono ma le iuni lakapi a Samoa, o lana ofo lea e fesoasoani ai i le aulakapi a o iai i Niu Sila i le Ipu o le Lalolagi.
O le tuuina atu o lea vaegatupe tele sa mafai ona auala i le lulu poo le raffle sa faatino e le kamupani lea na amata faatau i tua pepa i le masina o Iulai, ina ua mae‘a ona se‘i le isi ana lulu na faimeaalofa ai i nisi o faalapotopotoga tuma‘oti ma ekalesia.
O le lulu sa faia mo le Manu Samoa na se‘iina i le Aso Faraile, 16 o Setema 2011 i le ofisa o le kamupani i Fugalei.
O le lulu sa faatauina pepa i Samoa ma Amerika Samoa lea ua tulai mai e faamanuiaina le toatolu o tagata i Upolu ma le toatasi i Amerika Samoa.
Faaalia e le alii Pule o le kamupani le tofa Faimalo Allan Stowers, o le faafetai maualuga o le lagolago a le atunuu aemaise o paaga a le Pacific Ezy ua faataunuuina manuia ai le faamoemoe.
O le lagolago malosi a le atunuu ma paaga a le kamupani na siitia ai le seleni na tuuina atu mo le Manu Samoa lea e 70 afe, ae e limasefulu afe sa amata ai le ofo a le kamupani.
O i latou ua manumalo ile tulaga muamua o:
• Talitiga o Vaitele-fou…$10,000 le faailoga tupe
• S. Sua ….Amerika Samoa …$5,000
• Solomona Aimaasu…Magiagi…$3,000
• Ma le faailoga lona fā o Lafi Esera…Papauta…$2,000
O le masina lenei o Setema o loo faagasolo ai se isi faalauiloa a le kamupani o loo fuafua e maua ai faailoga mo tagata i Samoa e faaaogāina le tautua a le Pacific Ezy Money e lafo mai ai a latou seleni faamomoli mai fanau ma aiga i Niu Sila.
O faailoga o le a faalauiloa e aofia ai se TV flat screen, ma le faailoga tupe e amata mai i le $500 e oo i le $200 tala.
