O le saunoaga lea a le sui o le afioaga o Solosolo ina ua tapa sona finagalo poo se finagalo foi o le afioaga i le lē talia ai o le Afioga Leota Leuluaialii Ituau Ale, mai i le faaleleiga a le afioaga lea na faatautaia i le amataga o lenei vaiaso.
O le gasegase o Solosolo ua tele tausaga o molimauina e le atunuu ma o le manatu o le afioaga e tasi lava le tagata o loo i tua o lenei feeseeseaiga ua iu ai lava ina vaeluaina le afioaga.
“Na amata mai lava i le 1973 lenei faafitauli o Solosolo,” o se faaaliga lea a Leauvaasa Afa. “O le umi lea o lenei faafitauli, ma o le popolega tele lea o loo iai i tamā o le nuu o le faifai foi o lenei faaleleiga ae mae‘a ane toe tulai mai foi nisi feeseeseaiga, toe taape foi”.
O le taeao segisegi na amata vaaia ai le potopoto ane o Solosolo i le nofoaga e tele ina feiloai ai le afioaga.
O le aso 5 o Me lea na tuu atu ai le tautinoga a le afioaga i le Faamasinoga o Fanua ma Suafa e tatau ona faia ai le faaleleiga a le afioaga.
Ta‘ua e Leauvaasa ua tuu mai i luma i le Aso Gafua, le aso 2 o Me, 2011 lea faamoemoe ona sa talosaga le tofi o le itumalo, le afioga Fonotoe Pierre Lauofo, e fia iai ma molimauina lenei laasaga tāua i le faamaopoopoga o le afioaga o Solosolo, ma o le afiafi lava lea na tuua ai le atunuu e le afioga i le Sui Palemia ona o fonotaga i atunuu i fafo.
Na auai mai ai lava i le taeao le afioga i le Faipule o Anoamaa i Sisifo ona o le fia molimauina o lenei aso tāua i le taumafaiga a Solosolo e pei foi ona faatonuina ai e le Faamasinoga o Fanua ma Suafa, ina ia faatino loa le faaleleiga o nuu nei e lua ua tuu eseese ae toe foi Solosolo i le pulega e tasi o Alii ma Faipule ma ia mafai ona galulue faatasi.
O le sauniga lotu na muai faatautaia mo lenei faaleleiga ae na muai faatulai ese le Afioga Leota Leuluaialii Ituau Ale a o lei amatalia lea mafutaga tāua.
Na tapa le finagalo o le nuu i lea faaiuga ae o le tuutuuga o le faaleleiga ina ia aumai uma matai ua agai ese ma faatu le nuu laitiiti ina ia mafai ona iai se leleiga atoatoa.
“Ua tele tausaga o fai e lenei tagata uiga ua aaitui ai i le nuu,” o se saunoaga amata lea a le Afioga Leauvaasa Afa. “E pei ona ta‘ua o le 1973 lea na amata mai ai feeseeseaiga o lenei nuu talu ai lava lea sui o le afioaga. Na faatea muamua ona toe faalelei foi lea ae tulai mai foi isi faafitauli,” o le faamatalaga lea a Leauvaasa.
“O le 2005 na agai ai Solosolo i Amerika Samoa ma o inā na vevesi ai foi ua faatau atu le fautasi o le afioaga i Amerika Samoa.
Talu mai lava lea mataupu e na o le ‘alo‘alo solo mai lava ae ua faamautu ai ma lona nuu lea ua toe tuufaatasia nei ma le aotelega o Solosolo i le aso.
Ua tele ma anoanoai faiga lē lelei ua fai e lenei tagata i le afioaga ma e tulai mai nei isi faaleleiga na fai muamua, ina ua maliu se isi o matai o lo matou nuu, e lei iai.
Na ave le mataupu i le faamasinoga ina ua lē usitaia e matai nei le faatonuga a le Faamasinoga o Fanua ma Suafa ina ia toe foi mai i le nuu tele, o le mea moni lava o tagata nei e tofu uma i le falepuipui pe ana faaauau le lē usitaia o le faaiuga a le Faamsinoga o Fanua ma Suafa”.
Na toe fesiligia le Afioga Leauvaasa pe faapefea la le Faamasinoga o Fanua ma Suafa lea e tālia se faamaoniga o le faaleleiga lenei a o lea ua lē talia e Solosolo le isi matai lenei, o le matai tonu lea ua faapea mai le nuu e mafua ai lava le eseese o le afioaga.
“E tumau le matou tagi lea ua fai faasaga i le sui lea o le afioaga,” o se tali mai lea a Leauvaasa. Na ta‘ua foi e lenei matai o Solosolo, le faigata tele ona talia gofie o Leota Ituau Ale auā e oo lava foi i le taumafaiga a isi matai ua mae‘a nei ona toe foi atu i le nuu e lei iai lava lenei matai ma ona pau lava lea o le tali e ave i ai e le afioaga.
Sa tuu atu i le aso o le faaleleiga se talosaga a auauna a le Atua, i faafeagaiga ina ia toe silasila le afioaga ma toe liuliu le tofa mamao ina ia mafai ona faamagalo Leota Ituau Ale ma ia toe talia mai i totonu o le saofaiga a Alii ma Faipule o Solosolo. O le tali a le afioaga “seia iai se aso, seia fai se ai o le tiga o le nuu”.
O le tali lea na ta‘ua e nisi o matai na faapea ona toe ofi atu i le nuu tele, nisi sa i le faiganuu lea na taitaia e Leota Leuluaialii Ituau Ale, ua manino e toe iloilo nei e Solosolo le talosaga a le aufaigaluega a le Atua ua faataatia i ai.
“O le faamatalaga a tamā o le nuu, o le a taatia atu ia i latou ma e lē po pea se nuu,” o le saunoaga lea a Lemafa Mailo, o se sui o tagata o Solosolo ia sa faapea ona toe faaulufale atu ma talia i le faiganuu tele a Solosolo.
Na fesiligia i se lagona o le aiga ina ua toe foi i le faiganuu tele ae na ta‘ua e Lemafa Mailo, o le faafetai ua mafai ona toe tuufaatasia ma le nuu.
“E tāua tele le mafai ona faifai mea faatasi auā e ui lava e lei tulai mai ni vevesi i le vaeluaina o le nuu, ae e te fai mea fiafia lava pe a iloa o loo atoatoa le talitonuina ma le lagolago mai foi o isi sui o le nuu.
Auā e mo‘i lava o lea sa nonofo faatasi i Solosolo ae ua leai se faifai mea faatasi e pei ona sa iai ma ua manino lava ua iai le tuueseesega o i matou sa i le nuu laitiiti ma le nuu tele”.
Faaalia foi e Lemafa o i latou ia na faaulufale atu, o i latou ia o le isi itu o le fuaifale o sa Leota Leulualii, ma o i latou o suli o Leota Leuluaialii Lemusuitau Muaulu, o Leota Leuluaialii Savelio o loo i fafo ma Leota Leuluaialii Faauma.
“O le matou aiga e lē masani ai i le agai i le Faamasinoga ma ua faatasina lo matou aiga i le agai atu ma tuuaia ai pe molia foi i ni faiga faasolitulafono,” o se saunoaga lea a Lemafa Mai.
“O le asō e tasi lava le faamoemoe ina ia toe foi e faamaopoopo ma tautua i le faiganuu tele a Solosolo ma o le tulaga e pei ona iai le mataupu i le va o Leota Leuluaialii Ituau Ale ma le afioaga, o lona va lea ma le afioaga ma ua manino mai foi i finagalo o toeaiina o le nuu e taatia atu le mataupu, o lona uiga e mātau atu e iai lava se taimi ona feagai lea o le afioaga latou ma le Afioga Leota Leuluaialii Ituau Ale. Ae o le mea tāua lea ua tou agai mai o le a faatino, o le foi i totonu o le nuu ma ia faaauau ai le tautuaina o aiga ma le nuu atoa”.
Faaalia e Leauvaasa o le a toe talanoa le afioaga mo se tali maumaututu i le faatonuga ua aumai e le Faamasinoga, ae e lē o talia lava le toe oo atu o Leota Leuluaialii Ituau Ale. E faaauau lava foi le mataupu.