Ua iloga le saili malo o tamafanau a Samoa i itu eseese o le lalolagi. E masani le faafofoga i alo o Samoa o loo ta‘uta‘ua i le tele o tomai i itu tau a‘oa‘oga, o galuega, o taaloga, i atunuu i fafo e pei o Niu Sila, Ausetalia, Amerika.
Ae ua tutasi mai le alii o Sam Tautua, o se uluai tamafanau a Samoa ua tulai mai i se tulaga e fealumi faatasi ai ma nisi o alii ma tamaitai ua iai tomai e faaalialia ai a latou sikaili i laei ma teuga faaneionapo, e pei ona silasila i ai i le tele o taimi i luga o le televise. E lē gata i lea, e iai foi le tomai o Sam i tomai tau faasalalau, e pei o alii ma tamaitai o loo galulue mai le faasalalauina o tala i luga o le televise.
O Sam na fanau i Niu Sila, ae o le tele o lona soifuaga sa tuputupu a‘e i Sini i Ausetalia; o le taimi nei o lea ua aumau ma galue i Lonetona i Peretania. Peitai e ui lava i nei tomai iloga ma le mamao o le itu o le kelope ua aumau ai Sam ma auaumea ma le tele o tagata papa‘e ma i latou mai atunuu i Sisifo, ae lē mafai ona aveesea ai le agaga mitamita o lenei alii e fia faailoa pea o ia o le Samoa, na tupuga mai i ona mātua Samoa.
O le tausaga e 2010 na faamavae ai Sam mai se galuega maualuga foi sa galue tumau ai, ae amata loa ona agai e saili ina ia mafai ona tino mai lana moemitiga i le lalolagi o Faafiafiaga. O se alii talavou e iai lona faanaunauga, e lē gata ina ia mafai ona ia ausia ana moemitiga sa iai, ae o le taimi e tasi, ia faataatia se taiala poo se luitau foi mo isi alii ma tamaitai talavou, ina ia moemiti mo ni mea tetele i o latou olaga, ma ia finafinau e ausia na moemitiga.
E talitonu Sam, e leai se mea e lē mafai ona lē maua e se tasi, pe afai e matuā tuu atoa i ai lona loto ma ana taumafaiga. Poo le ā le faigata o foliga mai o se mea, ma pei o se mauga maualuga e faigata ona aea, ae a tuu atoa i ai lou loto, e matuā solofa i lalo lena mauga tele ma e manumalo ai.
Na amata atu lava i Ausetalia ona iloga mai le tomai o le alii o Sam, ina ua amata ona faaaogā e na te modeling pe faalauiloa mai nisi o oloa poo sikaili eseese faaneionapo. Sa galue foi i tomai e act pe na te faatino mai nisi faasalalauga, i luga o televise i Ausetalia ma isi foi atunuu, ma sa manumalo ai foi i le faatinoga o ana ata nei mo nisi o polokalame o ata faasolo a le televise.
O le oo atu o Sam i Lonetona ia Aperila 2012 ma faaauau pea i ana galuega nei, na faasolo ai lava ina iloga mai ai lona atamai tele i nei tomai, ma avea ai o se uluai Samoa ua savali i luga o le fata lea e savavali ai alii ma tamaitai e latou te faalauiloa mai ituaiga o teuga eseese, i lavalava, ma soo se teuga, a le UK/European Runway mo le African Fashion Week i Lonetona, i le taimi a o faagasolo Taaloga o le Olimipeka i Lonetona 2012, ma e tusa ma le 5,000 people sa maimoaina lea faaaliga.
Ma o loo faasolosolo pea ona moomia le alii o Sam i faaaliga lava faapea, e pei foi ona iai isi faaaliga talitutusa lea ua sauni atu e toe savali ai foi, le Global Off-Schedule Fashion Week Show, o ni faaaliga e fefiloi ai le tele o suafa ta‘uta‘ua i le lalolagi i itu tau teuga.
Ua iloga fanau a Samoa i le tele o taaloga i le lalolagi, e pei o le lakapi, netball, faapea foi ma le alii ua oo i le faatinoga o ata tifaga, ‘The Rock’, ae o lea ua luitauina mai e Sam nisi fanau a le atunuu, ina ia mafaufau foi i lea tomai e lauiloa ai i le itu tau i sikali mo lavalava ma le tele o teuga eseese faaneionapo, auā o se tasi o tomai e oo atu ai foi i nisi o maketi tetele o le lalolagi e pei o le UK & Europa.
Ua iloga ma talanoa tagata i Lonetona e uiga i tomai o lenei alii Samoa, ae o lea ua iai lana fuafuaga faatasi ma lana pulega, o le a faasolosolo atu pea lana sailiga malo i le malo tele o Meleke poo le Iunaite Setete i le faaiuga o lenei tausaga.
E manatua e Sam, e telē lava le aafiaga o taa‘iga o le tausiga a si ona tina i lona olaga ua iai nei. O Sam o se alo faasino i le tina ia Talaimanu Leiataua mai le afioaga o Fasitootai. E manatua e Sam o nisi o suafa matai i le aiga o si ona tina, o le Aiono ma Leiataua, ma o ona piitaga nei i lona tupuaga Samoa, e lē mafai ona mavae ese mai lona mafaufau, o le ala foi lea o lona faanaunauga, ina ia faamatala lana tala, ma le faamoemoe e iai se aogā ina ia luitauina ai foi nisi fanau a Samoa ia latou ausia nei moemitiga tetele ma faaaogā i ai o latou tomai auā foi ni lumanai manuia.
Ua taatia nei foi se isi moemitiga o Sam o loo galue atu foi iai, ina ia oo mai se aso e pulea ai lava e ia lana kamupani mo le faatinoga o faafiafiaga (Entertainment Agency), ona e iai lava lona loto ina ia faaaogā ai fanau a le Pasefika, auā e telē lona talitonuga, afai e lelei ona aoaoina ma koleni lelei tagata Samoa, e matuā maoae lava le talenia i itu tau faafiafiaga.
O se taimi i le lumanai o le a toe faailoa atu foi nisi faaaliga o loo faapea lava ona faaaogā ai foi Sam Tautua, auā o loo faaauau pea ona tofia lenei alii i nisi foi tauvaga, e pei o le UK Fashion Finest’s ‘Male Model of the Year 2012’.
