O loo taulamua se alo o Samoa, le susuga Vasa Tasele ma lana soa le alii o Joe O’neill i se savaliga o le a la savavali ai mo le silia i le 600 kilomita mai Aukilani e oo atu lava i Ueligitone.
Ua faatulaga lea savaliga tele e amata i le Aso Gafua o le vaiaso fou, aso 22 o Oketopa, 2012.
Ua amata lenei taumafaiga i Aukilai i nisi o vaipanoa ma ua toatele foi le mamalu o le atunuu ua fiafia e auai atu i ai, ma lagolagosua i lenei taumafaiga.
E ese mai se faamalositino sili ona lelei ma taugofie, ae o loo faatumutumu lenei taumafaiga i le unaia o tagata uma ina ia nofouta ma tetee atu i le faafitauli matuia o loo taatele i lenei vaitaimi o le faasauā ma le faileagaina o fanau.
E lē gata i lea, o loo saili seleni nei Samaria agalelei, mo se fesoasoani tau tupe e lagolago atu ai i polokalame a le Starship Foundation, o loo galulue e tausia ma togafitia fanauiti i le falemai o le Starship i Aukilani.
O le faatalauula a nei alii, o laua o le a faia le galuega mamafa o le koleni ma savavali mo le isi lima masina o lumanai e amata mai le Aso Gafua, 22 Oketopa, ae o loo la moomia le lagolago a soo se tasi, e ala i le foai atu o seleni e fesoasoani ai i galuega a le Starship Foundation.
Mo i latou uma o loo alala i Niu Sila, e mafai ona e tāpā se lisiti o lau foai pe a e finagalo i ai mo le toe maua mai ai o lau tupe i le lafoga.
E mafai ona asiasi atu i le itulau o le facebook mo nisi faamatalaga e malamalama atili ai le taumafaiga alofa a nei taulelea, pe te faasoa atu foi i isi ma faamatala i ai lenei taumafaiga a Vasa Tasele ma Joe O’neill.
http://www.facebook.com/pages/Walk-The-Talk/460438557306240, poo le upega o fesootaiga:
www.fundraiseonline.co.nz/WalkTheTalk