Saunoaga Afioga i le Palemia i le Atunuu – Susuga Tuilaepa Sailele Malielegaoi

Afā o Evan 13-14 Tesema 2012 Potu o le 2AP, 15 Tesema 2012, 4:00 i le Afiafi


O le a ou faaaogaina lenei masele ua maua ina ua see ese atu ma le Atu Samoa le Afā o Evans, e fai ai au ma Afioga taumomoli o le Ao Mamalu o le Malo, le Sui Tofia, Minisita o le Kapeneta ma Minisita Lagolago, le Faamasino Sili, le Fofoga Fetalai ma Sui Usufono o le Fono Aoao Faitulafono.

Ou te muai tapui ai le tapu a aloalii ma ou vaisausauina paia o Samoa i ona tulaga faalupelupeina.

O paia lava ia e faasino i Aiga ma Latou Tama, Tulatoa o Aiga ma Faleupolu o Tofiga, le Usoga a Tumua ma Pule-e-Ono i Salafai.

O paia foi auā le tapuaiga i faiga malo a Tutuila ma Manua, i le Tafatolu o le Malo i le Pulega, le Faamasinoga ma Maota Faitulafono, o paia lava ua popo ma pā e lē solo, aua le Faleagafulu ma le Nofo a Ma’opū, Faatui ma Tootoo ma upu i le Manua Tele.  A e matua lava le tuu i le faanonogamanū i le Aufaigaluega Paia a le Atua.

Sa o tatou momoe ma manū e lē fati a e sau pea mala e atia‘i lou tou soifua ma so matou ola puleesea.  O aga ia o le siosiomaga o loo tatou soifua ai.

E iai pea le maatui ma le maagao, ma le maa faalaveaaao. Peitai ua uma lava ona taoto ma tuumatāmaga e le Atua puipui ma tuaoi tatou te ola fiafia ai ma faatumau ai pea le matagofie o le paleni o mea uma o le natura na ia faia i le atoatoa.

E pei o le oso a‘e o le lā mai Sasae ma goto ifo i Sisifo, a e ā le tau o mugālā ma le tau e toulu ai le suatimu mai le lagi e faasūsū ai le eleele ua matūtū e feinu ai i tatou uma, inu ai ma laau, ma meaola uma tatou te tua i ai aua taumafa o le tino.  E le mafai foi ona tupu fua mea faapena.  O upu o le Tusi, o le aso ma le mea e tupu ai.

O le popolega pito ogaoga lea i taitai o le lalolagi i le taimi nei, o suiga matuiā o le tau e ono lē matāofia ai le tutupu ai o afā matuiā, o galulolo, o mafuie, o tāfega ma lāmala, e afua lava i mea soona fai e le tagata na tofia e le Atua e leoleoina le faatoaga,……………e pei o le soona tatā o laau ua vevela ai le ea ma tutupu ai mala sa lē masani ai.  A e a le soona tata o laau i tafa o auvaitafe ma iu ai ina avea ma faapogai o le afaina ai o le soifua i tafega oso faafuasei ma faatama’ia ai maota ma laoa o i latou e nofoia autafavai.

Tatou te lē tuuaia fua le Atua Silisili Ese i nei mea.  Auā o loo Ia musumusuina pea i tatou i o tatou tiute ma tofi e toe faafoi ai le faatumau o le matagofie o Lana foafoaga mamana mo Samoa, nei ma ēluā ina ia saogalemu ai lo tatou siosiomaga.

Sa galulue le tatou Malo ma lana Komiti Faapitoa mo Faalavelave Faafuasei e tusa ai ma ana matafaioi tauave.  E aofia ai Minisita ma Faauluuluga o Matagaluega ma Sui o tatou Paaga mai Fafo.

O loo tau faamaopoopo nei le tuufaatasiga o aafiaga eseese o le atunuu faatasi ai ma auala e foia ai.  Sa folasia i luma o le Komiti mataupu ogaoga e ao ina ave i ai le faamamafa e faapei o le:  Eletise, Suavai, Saogalemu faapea ma le Soifua Maloloina lautele.  O ia tulaga tāua uma, o le a faama‘alo iuofe foi aua gaioiga tatau ma talafeagai e faapei ona o le a tauaofia ai le fono a le Palemene i le aso 18 o Tesema i le vaiaso fou.

Sa faatino le asiasiga i le mae‘a ai o le Fono a le Kapeneta ma le Komiti Faapitoa mo Faalavelave Faafuasei i le taeao nei i nofoaga o loo mapu i ai le mamalu o le atunuu ua faaleagaina o latou maota i tāfega, ma o loo faamautu i nofoaga e pei o le Kolisi o Samoa, Maota o Tausisoifua i Motootua, faapea ma le Faletaalo i Tuanaimato.

O loo māua foi o loo i ai nisi faapea o loo i le nofoaga o le Iunivesite Aoao o Samoa. A o iai pea i latou i maota sulufai nei, e talosagaina foi le mamalu o aiga lotu ma aulotu tūlata ane i totonu o le talafatai o Apia, i le agaga Kerisiano, mo sau tou lagolago i soo se auala.

E ui ina ua tatou taunuu i puapuagā ona o faalavelave faanatura, tatou te talitonu ma le faatuatua i lo tatou Atua, Na te lē tuulafoai i tatou, a e logo pea ia i tatou le Fau o Manū sa i Logoā aua o loo soifua pea le Atua.

O Ia na te faamaise ma faamafanafana i o outou finagalo mafatia ona o le soifua o nisi ua to‘esea, faapea ma meatotino ua maumau.

Faamalō i le agaga onosai ma le faatoatoa i pulega mamalu a Alii ma Faipule faapea le lagolago a le vasega a Pulenuu ma Sui o le Malo, Sa‘oao ma Augafaapae ma le Malosi o Nuu.

Faatino lau tou pitolaau aua tulaga masani o le faamamā o auala-tetele ma auala-galue ina ia toe vave sololelei auala mo femalagaiga.

E lē tauiso le gasolo manuia o a tatou fuafuaga ma faamoemoega i le mana o le tatalo a le Aufaigaluega Paia a le Atua.  O lau tou tatalo, ua faasaoina ai nisi tulaga sili atu ona ogaoga semanū e o o i ai Samoa.  Ua mae‘a lava foi ona atofa e le Fono a Ekalesia i le lua masina talu ai le tatou Vaiaso o Talosaga ma Anapogi ina ia pa’ū tonu i le vaiaso muamua o Ianuari i tausaga uma, a e amata i le aso 30 o Tesema o le masina nei ma faaiu i le aso 6 o Ianuari 2013.

O lea faatoa amata le vaitau o timuga ma afā seia tau ia Mati o le tausaga fou.  A o la outou tatalo, e faatau manuia ai le ifoa’i o le taulaumea o lenei tausaga, atoa ai foi le fana‘elupe o le tausaga fou.

Talosia ia faapaolo e le Atua ona aao alofa i luga o Samoa i lenei vaitau o afā.

Soifua.