O le a mapu ia i fala mātū, ou Paia sautuaoo Samoa, auā o oe o le vao filifili, o le i‘a e iviivia, ma le fue e lavelave. O ou Paia e lē Popo, ma ou Pā e lē solo. O le Ao mamala i le faasouga o Ao, ma le atu folasa. Auā, e leai lava se faafiailoa mae‘ae‘a, na te toe totofi paia o Samoa ua lalago tonu i ona tōfiga ma‘ape mai anamuā.
Ae tau ia ina ou su‘i tonu le mata o le niu, ma uluulu matāfolau se leo vaivai, e faatulou atu ai i le Paia Maualuga ma le Mapuepue o Samoa, o loo afifio ma papaaao i totonu o Aotearoa, aemaise ai le Laumua nei o Ueligitone.
O outou Paia Faale-Atua, Paia Faale-Malo, ma Paia Faale-Atunuu, o le a nuunuu atu ia Faatini o Tausala. Auā o outou Paia e mai le Vavau, e oo atu lava i le Faavavau. Ma ua iai foi Faleupolu o Tofiga, o le latou matafaioi lea, o le faafaileleina o Paia ma Mamalu o Samoa.
Ae tau ia ona ou faapea atu, Tulou, Tulou, Tulouna lava.
Avea ia lo‘u leo, e fai ma fofoga tau molimoli, o le Afioga i le Ao Mamalu o le Malo o Samoa, le Afioga i le Sui o le Fono a Sui Tofia, le Alii Palemia ma lana Kapeneta, le Fofoga o le Fono ma le Palemene, ae tainane le Tapuaiga a Auauna Paia a le Atua ma Tagatānuu uma o Samoa, e momoli atu ai Alofaaga ma Faamanuiaga o le Kerisimasi ma le Tausaga Fou, i le Paia Maualuga o Samoa i totonu o Niu Sila nei.
A o tatou sauniuni atu i le faailogaina o le Aso Soifua o le tatou Alii Faaola, e ao ona o tatou toe mānatu i lona alofa tunoa ia Samoa, ma i tatou uma i Niu Sila nei, i lenei tausaga ua tau faaiuiu.
Tatou te momoli le viiga ma le faafetai, ona o faamanuiaga uma sa o tatou maua, e lē gata i le Faaletino a o le Faaleagaga.
O faamanuiaga e ala mai i le itu tau le Soifua Maloloina, le itu tau le Tamaoaiga, le itu tau Taaloga ma A‘oa‘oga (aemaise ai mo Alo ma Fanau), le Sakalameta Paia o le Faaipoipoga, le Soifua mai o le Tagata Fou, ma isi lava Faamanuiaga sa o tatou maua, e ao ona o tatou sii ai pea le viiga ma le faafetai i le Atua Silisiliese.
O faanoanoaga foi ma tiga sa feagai, ma aafia ai nisi o i tatou i lenei tausaga, e ao pea ona o tatou tuu atu i le Tamā i le lagi, ona o ia e ou le mana uma. O ia na te foai, o ia foi na te toe aveesea.
O le tausaga na tuanai atu nei, sa feagai ai Samoa ma ni mafatiaga tugā, ona o le ma‘ema‘eā o le Afā Fulifaō o Eveni. Sa tele ni Soifua na afaina ai, atoa ma le anoano o meatotino sa faaleagaina.
Ae ui i lea, ona o le tele o le alofa ma le foai mai fafo i Paaga masani a Samoa, faatasi ai ma fesoasoani e tele na maau ma milomilosia i ai lo outou Paia ma Mamalu, o lea ua toe faaleleia ai le tele o mea sa faaleagaina i totonu o si o tatou Atunuu. O le Tamaoaiga o Samoa, ua molimauina lona tulaga toe tuputupu a‘e, i le tausaga nei.
E toe avea ai lenei avanoa, e momoli atu ai la‘u faafetai tele, ona o lo outou manatu alofa pea ia Samoa. Ua lē gata i seleni o loo outou lafoina mo aiga o loo faamuli mai, a o oloa foi o loo auina atu mai lea taimi i lea taimi. Ua faamalo le alofa ma le agalelei. Faafetai i lo outou manatu pea i le tapuaiga a Aiga, Nuu ma Ekalesia.
E fia avea foi lenei avanoa e faaleo atu ai la‘u faamalo ma la‘u faafetai tele, ona o la outou lagolago mai i galuega fai a le tatou Ofisa nei. E utiuti la tatou aufaigaluega. Ae peitai, o le fesoasoani mai a lo outou Paia ma le Mamalu, sa mafai ai ona faatino le tele o a tatou galuega i lenei tausaga.
Faafetai i le Faalapotopotoga a le Ulalei, mo le latou lagolago mai i le faatinoina o le Feiloaiga lea sa fai i le amataga o le tausaga nei, mo le tatou Manu Samoa Taitoafitu.
Faafetai atu foi i le Mafutaga a Sui Mamalu uma o Ekalesia, mo le fesoasoani mai i le faailogaina o le tatou Tutoatasi i lenei tausaga. E lē gata i lea, e fia momoli atu foi la‘u faamalo ma le faafetai i Afioga a Patele, ma Susuga a Faafeagaiga mai fata faitaulaga e fia, mo le latou galuega tāua o loo faifai pea, mo tagata Samoa uma i totonu o Aotearoa.
E avatu foi la‘u faamalo ma le faafetai i le Peresitene ma le Faalapotopotoga a le Fagasā, auā le latou matafaioi tāua, o le a‘oa‘oina ma le faaolaolaina lea o le tatou gagana Samoa, aemaise ai a tatou Tū ma Agaifanua.
Le Peresitene ma Sui o le Fono Faufautua, faafetai mo la outou foi pitolaau, o le fesoasoani lea i le Mamalu o le Atunuu, auā lava le tau faafoia o faafitauli o loo feagai ai ma latou.
I isi Faalapotopotoga eseese, i itu tau le A‘oa‘oga ma Taaloga, faatasi ai ma le Paia Lasilasi o tagatānuu uma o Samoa o loo galulue i galuega e tautua ai o tatou tagata, e momoli atu la‘u faamalo ma la‘u faafetai i la outou foi sao tāua.
E fia avea foi lenei avanoa e momoli atu ai la‘u faafetai i le Afioga i le Aloalii, o Galumalemana Afeleti Hunkin, mo lana tautua mo tagata Samoa i totonu o Niu Sila, i nei mau tausaga e tele. Ua faamalo le finau. Malo le lotonuu. Faamanuia le Atua i lou toe taliu atu i si o tatou Atunuu pele o Samoa.
E faaiu atu ai se faamatalaga i le momoli atu lea o la‘u faamalo ma la‘u faafetai, i le Afioga a Afamasaga Moresi ma le Aufaigaluega i le Leitio a le Laumua. E telē na‘uā le tāua o la outou matafaioi i le tautuaina o ō tatou tagata i totonu o Niu Sila, aemaise ai i Ueligitone nei. Ua faamalo le fai o le faiva. Faafetai le tau logologo.
Alofa le Atua Soifua ia puipui Samoa mai ni aafiaga i matagi malolosi, i lenei vaitau o Matagi ma Afā.
Faamanuia tagatānuu uma o Samoa i itu e fā o le Lalolagi, aemaise ai lo outou Paia ma le Mamalu o loo Afifio ma Papaaao i totonu o Niu Sila nei.
Ia outou maua se Kerisimasi Saogalemu ma le Fiafia, faatasi ai ma se Tausaga Fou, ia sili atu ona Manuia.
SOIFUA
