Saunoa Vaifale Sola Sagato A Tauiliili e fia aulia lona 100 tausaga

Hon Aupito Toesulusulu Sua William Sio ma le tama ia Vaifale Sola Sagato Aki Tauiliili

O loo faataamilo pea malaga a le Minisita o tagata atu motu o le Pasefika ia Niu Sila atoa e faamalamalama le paketi a le malo i pitonuu taitasi, ma fesiligia po ua oo atu le paketi lea a le malo i totonu o latou pitonuu auā le faatinoina o a latou galuega fai. 

O le afiafi o le Aso Faraile na afea ai loa e le Minisita ia Aupito Toesulusulu Su’a William Sio le pitonuu o Whanganui mo lana malaga taamilo.

Ae na faate’ia le Minisita i totonu o lea pitonuu i le tulai ai o se tasi o tamā matua e suafa ia Vaifale Sola Sagato Aki Tauiliili mai le afioga o Leauvaa ma faafeiloai le latou faigamalaga. 

O le itu na faate’ia ai le afioga i le Minisita ina ua maua se laua feiloaiga ma le tamā matua ae faailoa ane ia te ia o le aso 4 o Oketopa i le tausaga nei e atoa i ai lona 94 tausaga, ma o lana tatalo i le Atua ina ia mafai ona ia aulia atu lona 100 tausaga o lona soifua.

  O le tamā na malaga mai i Samoa i le tausaga 1966 ma o se tamā saili malo i faatautaiga o lona aiga ma le manuia o lana fanau. 

E malaga mai i Samoa o toaono le fanau sa fananau i Samoa ma le toatolu sa fananau i Niu Sila nei lea ua maua ai o laua alo e toaiva. 

O le toeaina o se tagata vali fale, o lana lea matata sa tausi ai lona aiga iinei aemaise ai o aiga i Samoa. Ua 88 tausaga le matua o le soifua o le tina o le aiga ae o loo soifua mai foi.

Na faailoa e le Minisita ia Auptio Toesulusulu Su’a William Sio, e tele tagata matutua na feiloai i ai, ae pei o se tagata matua lea ua muamua feiloai i ai ua sili atu ma le 90 tausaga le matua o le soifua i pitonuu taitasi o Niu Sila o loo malaga taamilo ai, ua ia faafeiloaia ni malaga faapenei a le malo. 

Na faate’ia lana faalogo i le lelei o le aganuu a le tamā aemaise ai o le malamalama ma le lelei o lona mafaufau i mea uma lava e talanoa mai ai. Saunoa Aupito i le laua mafutaga ma lenei tamā e foliga mai e lē o se tagata matua, ona o lana faalogo i lona siufofoga i le tami na lauga ai, e ese ma le malosi ae sa ia maitauina foi i le savali a le tamā o le malosi ia o lona tino.  Ma e maofa ai lona loto i le maoa’e o le matua ma le tele o tausaga ua aulia e le tamā ia Vaifale Sola Sagato Aki Tauiliili ae o loo fitifiti lava lona malosi i ona tiute tauave i totonu o lona aiga ma le ekalesia. 

O le talitonuga foi a le Minisita e taunuu moomooga a le tamā i le aulia o lona 100 tausaga pe a faatusatusa i lana vaai i le malosi o le tino o Vaifale o loo iai i le taimi nei.  

O le ola fiafia ma le tausiga lelei o le vailaau lea e umi ai le soifua o tuaa matutua.