O le SOPAC o se faalapotopotoga a le Pasefika e nafa ma galuega tapenapena i taimi o faalavelave faafuasei faalenatura faapei o afā, lologa, mafui‘e, ma sunami.
O le sui o lea faalapotopotoga na faatautaia le aoaoga mo sui o matagaluega a le Malo, ma sui o ekalesia ma faalapotopotoga tuma‘oti o latou ia e faia le galuega o le pulea ma vaaia nofoaga sulufai poo disaster centers i nuu ma afioaga o le atunuu, auā taimi o faalavelave faafuasei.
O le pule sili lagolago o le ofisa o tapenaga mo faalavelave faalenatura, le tamaitai o Filomena Nelson na ia faaalia, o se tapenaga tāua tele sa faatautaia auā e ao ona matuā lava taoso i latou e vaaia nofoaga sulufai i nuu ma afioaga i mea uma e tatau ona iai ma ia saogalemu mo le faaaogāina e tagata.
E leai ni fale o fausia faapitoa mo lea faamoemoe ma o le isi lea o galuega a i latou sa auai i le aoaoga, ia siaki lelei fale i nuu e pei o faleaoga poo ni falesa o le a sulufai i ai tagata, ina ia mautinoa o loo malosi, lelei faleui, lelei le suavai, malosi le fola o le fale ina ne‘i malepe pe salalau pe a toatele tagata e nonofo ai.
“O vaega uma lava ia o loo taumafai e tapena lelei i ai tagata e vaaia nofoaga taitasi, auā e oo loa ina tupu se faalavelave faafuasei, e lē toe mafai ona sagatonu le mafaufau i le vevesi i le taimi ua tupu le afā, pe ua aafia fale ma nofoaga o iai tagata i ni lologa ma ni tafega malolosi poo se sunami foi”, na saunoa mai ai Filomena.
O le faia tonu o le tapenaga i le masina o Novema ua mae‘a atu nei ua fetaui ma tapenaga i le taimi lenei o le tau o afā, timuga ma lologa i le atunuu. O le afa o Eveni lea sa afatia ai se vaega o le motu o Upolu ma afaina fale o aiga i lologa a o nisi fale sa faaleagaina i le malolosi o matagi sa sulufai aiga i nisi o faleaoga ma falesa sa saogalemu.
O le taulaga i Apia o faleaoga a le Kolisi o Samoa i Vaivase sa mapu i ai le toatele o aiga i le Vaimauga sa afaina laoa ma maota. O nisi ia o faleaoga e saogalemu ma malu lelei. Faaalia e Filomena o tapenaga o loo faia o loo taulai lava i le saogalemu o soifua o tagata lautele ma ia tau mamao ese ma ni nofoaga e matuā faatama‘ia ma faaleagaina i ni afā, ni tafega ma lologa poo taimi o mafuie.
O le maota o tausi soifua i Motootua sa faia ai le aoaoga e lua aso lea sa auai e lē gata o sui sinia o matagaluega eseese a le Malo, e o sui o nisi o ekalesia e pei o le ekalesia a Iesu Keriso o le Au Paia o Aso e Gata Ai, ma le Ekalesia Asofitu o le Toe Afio Mai.
