Na tuu e le Atua le avanoa i le loto o Lana tagata na fai, peitai ane poo ā tumu o le lalolagi e lē mafai ona malie le loto se‘i vaganā le Atua, o Ia na te faamalie ma toe faafoi mai le oti i le agasala, o Lona finagalo alofa lea ia toe faaolaola ma toe aumaia i le ola.
O le autū lea o le sauniga e pei ona ofaga potopoto ai le mamalu i aulotu e ono a le Ekalesia Faapotopotoga a le Atua i Hornby, Riccarton, Linwood, Aranui, St Lukes i totonu o le malumalu i Shirley i le afiafi o le aso sa 31.10.2010, lea na taitaia e le susuga Pstr Sapina Iaeri.
O le upu a le Atua sa laugaina e Pstr Uasi Valavala ma e maeu le matagofie o le momoli maia o le feau tāua i lea aso, o se faalumaga faaleagaga na matuā laulelei ai le tagata galala ae o se i‘a tunu foi mai le gataifale o le Atua.
O nisi nei o le aufaigaluega sa auai, Pstr Kilaia Fialele, Pstr Tavita Seumanutafa ma Pstr Tai Laufiso.
O le latou sauniga mulimuli lenei o le tausaga ma e taitolu masina ma faapolokalameina.
E faapena ona valaaulia ma talia soo se tasi ua fia mafuta ma auai ai, lea la sa maua ai le avanoa o le tusitala e molimauina lenei faamoemoe tāua.
Na faamamafaina e le failauga o le aso e faapea, e lima ni agaga ua taofiofia ai le tagata i le faamaoni o le Atua, e pei o le masalosalo, lotoleaga, faafia amiotonu ae lē amiotonu, agaga vavae ese ma le manatu faapito.
Na sosoo ai ma aitema faaevagelia a autalavou eseese. Manaia le felanulanuai o tapenaga ae iai foi nai autalavou faato‘ā a‘o atu i le aso lea si a latou pese, molimauina nai tina ma tama matutua sa lagolagosua ae o le itu tāua o le fiafia o tagata uma. Tiga lava na taugata le soifuaga, afaina fale i le mafuie atoa ma aftershocks lē mapu, ae mauaa pea i le Atua.
O le susuga i le toeaina Talosia Valavala sa faafoeina le sauniga masani o le toe faafouina e pei ona masani ai le ekalesia faatasi ai ma pesega mālie, ona faaiu lea o le lotu tuufaatasi ma ona sauniga uma i le manuia ma faaiu atu ai i le Atua Lona viiga, ma tuumuli atu loa i le hall mo le taumafataga ti o le afiafi.
