O le filemu o le Atua, o loo iai faatasi ma le Amiotonu ma le faimeatonu atoa ma le alofa i le uso a tagata.
E lē o le faataumatatao e maua ai le Moni, a o lou loto malie ma lo‘u loto malie e tatalo o ta loto, sia nofotupu le Atua o mea moni i o ta loto.
O le uluai sauniga a le Ekalesia Aso Fitu Samoa Tutoatasi i Kalaiesetete, na amataina i le po o le uluai aso o lenei masina, 01.08.2010 ae na taualugaina i le Sapati, aso 14.08.2010 ma e lua vaiaso atoatoa o lenei faamoemoe.
E fa lala ua aofia i totonu o lenei mafutaga Kerisiano e iai le aulotu i Linwood, Shirley, Redwood faapea le center autū i Cashel lea o loo taitaia e le taitai matagaluega Pastor Meki Fesolaa‘i, faatasi ma susuga i faifeau o Anamoa Koko ma Siaosi Toailoa.
I le lua vaiaso a o ofaga potopoto ai lenei mafutaga e ala i a‘oa‘oga faakerisiano i fesili ma tali, sa mafuta faatasi i le fiafia aemaise le laugaina o le upu ma le avefeau a le Atua sa faatautaia lea e le faifeau susuga Siaosi Toailoa.
O le susuga i le toeaina Ioane Lealiifano sa nafa ma le faatulagaina o polokalame mai lava i le amataga, seia taunuu i le uluai aso na fofogaina ai ma faataunuu le aiga fiafia, o i latou ia ua ofi mai le aiga o le Atua e ala i le papatisoga, aemaise ua manumalo i le tuugamau suavaia.
Na faatumulia le hall a le Ekalesia i le nofoaga autū i Cashel i le aso 15.08.2010 mo le taualugaina e ala i se taumafataga fiafia na mae‘a tapena e le mamalu o le matagaluega, auā le faafeiloaia o pepe fou e toa sefulutasi mo le ekalesia e pei o Shanon Manera, Steve, Pedro, David, Tiffany Tavui, Frank Malu, Joe, Iosefa, To‘aono ma Aunoa Iosefa faapea Siaosi Sauvao.
O le fofoga o le aso o le susuga Leigagato Tailua, ma sa faatasia ai le latou lupe faalele (Talavou mo Iesu) o le alii o Fialupe o loo aotauina i Aukilani mo lana faamisiona.
E maeu foi le matagofie naua o lenei aso faailogaina i totonu o le ekalesia i le auai o nai tina ma tamā matutua o aulotu uma e fa, aemaise tupulaga talavou e ese le toatele.
Na faia foi le tufatufaina o faailoga ma le laugatogi mo mataupu sa faia i le lua vaiaso aemaise nai meaalofa mo ē na papatisoina.
Ina ua mae‘a ai le taumafataga, sa faapea foi ona alo atu le matagaluega mo nai meaalofa teutusi auā le mamalu o faifeau aemaise le susuga i le taitai matagaluega i Saute, Pastor Meki Fesola‘ai.
E faafoi pea le viiga o le Atua ina ua a‘e manumalo le faatamasoaliiga ua iai ni agaga fou mo le Atua ma lona malo e ala i le Ekalesia Aso Fitu Samoa Tutoatasi i Kalaiesetete.
Avatu ai ma le faamalo a le tusitala i faiva alofilima o le aulotu sa tapena fiafia faafafine toaga i lena aso manaia.
Malo tatalo, o lenei ua a‘e manumalo le faatamasoaliiga ma ua iai ni agaga e laveaiina mo le Atua ma lona Malo.
