Sauniga lotu i Brisbane e talosia ai mafatiaga o Samoa

E ui lava ina mamao mai Kuiniselani i Ausetalia nei, ae lei mafai ona natia ai lagona e le fia tausoa faatasi o mafatiaga o loo iai i nai o tatou aiga ma le atunuu pele o Samoa, a o iai pea i lenei vaitau o mala e pei ona aafia tele ai nisi o aiga, uo pele ma e masani i le galulolo talu ai nei.
E pei foi la ona faatinoina ai se sauniga lotu faapitoa i le le po o le Aso Toonai, 3 o Oketopa, lea sa faataunuuina mo le talosiaina foi o nai o tatou tagata i Samoa.
O le taitai o le sauniga o le afioga i le Sea ia Setu Faaniniva mai le Ekalesia Metotisi.
Sa avea le susuga i le toeaina ia Terika Reupena ma sui e saunia se lauga o lea sauniga faapitoa. Na saunoa le afioga i le faatonu  e faapea, e lelei lava le soso i totonu o le vaa. o faafeagaiga uma sa fai sao i lea po e aofia ai le susuga i le faafeagaiga ia Pr Samuelu Afamasaga, Tagaloa Fanene, Makisua Reupena, afioga ia Patele Epati Tamati, Faavae Avia ma Tafeama-alii Tai Le’uo ma nisi lava o faafeagaiga sa lagolagosua.
O le susuga lava i le failautusi ia Rev Milo Faaleava sa feagai ma le faagaioiga o polokalame uma o le sauniga lotu i lea po.
O viiga o le Atua sa lagiina e le aufaipese a le Katoliko, Ekalesia Aso Fitu o le Toe Afio Mai ma le aufaipese a le EFKS.
O le malumalu o le Ekalesia EFKS lea o loo galulue ai le susuga ia Rev Milo ma le faletua ia Talamasinei Faaleava sa faataunuuina ai lea sauniga, ma sa faatumulia i le mamalu o le atunuu. Na auai foi le sui o le au faitelevise i lea po. Na saunoa ai foi sui e toalua o le faa-Setete a Kuiniselani, Honourable Anna Palaszuk ma Honourable Tamaalelagi Bernie Ripoll.