O le afiafi o le Aso Sa na tuanai atu nei na tauaofia potopoto ai le mamalu ma le paia lasilasi o Samoa eseese o afifio i Melepone, i se sauniga lotu e talosia ai ma sapasapaia si o tatou atunuu faapelepeleina, aemaise lava o le mamalu lautele na aafia ma gapatia i le afa malosi o eveni.
O lenei faamoemoe na tuufatasia ma faapolokalameina e le Fono faufautua mo tagata Samoa o Vitoria, na valaaulia le tele o Ekalesia eseese, o le mamalu lasilasi o Samoa atoa, faatasi ai ma nisi o faalapotopotoga faale atunuu ma le malo, ma nisi foi mai isi atunuu.
Na faatumulia le malumalu tapuai o le Ekalesia Uniting Church i Balwyn i tupu ma tamaalii, tama ma tina, tuaa sinasina ma le mamalu o Samoa lasilasi, na sootuli sootauau i talotaloga ma le faamanu i le suafa mamalu o le Atua le faavae o Samoa, aemaise foi o le aao mafola e ala i le seleni paia e silia ma le lua afe tala, o le foai na aoina faapitoa, e foai atu i se tasi o faalapotopotoga Ausetalia le ADRA (Adventist Development and Relief Agency) o loo galulue malosi mo fesoasoani i aiga puapuaga o i Samoa.
Na saunoa amata le taitaifono o le Fono faufautua le susuga ia Stanz Atoa, e faafeiloai i le paia ma le mamalu o le aofia, ona amata ai lea o le sauniga na taitaia e le susuga i le faafeagaiga ia Uilisone Kiliona Mafaufau, o le afioga folafola a le Atua na saunia e le faafeagaiga ia Sani Vaeluaga, faatasi ma nisi o auauna totofi na lagolagosua i nisi o vaega fai o le sauniga, maea ona alo ai lea i le malu afiafi na saunia e le Fono, ona saunoa faafetai lea o le afioga ia Lemalu Faatau e fai ma sui o le Fono e faafetai i le aufaigaluega aemaise o Samoa potopoto, ona tatala ai lea o le fili alii ma le viiga o le Atua ua maualuga. Faafetai lotonuu, malo le faaeaea
