Sauni Tua mo lana fusuaga i Aukilani Sisifo

E mautinoa o se tasi lenei o tala o loo nofo tatali uma i ai le toatele o le mamalu o Samoa e le gata i Niu Sila nei, a o le nofo taputapuai mai o si o tatou atunuu i Samoa, poo afea ae o fea foi le isi nofoaga o le a toe faia ai se isi fusuaga a le alo o Samoa, le afioga ia Toaletau David Tua.
O le Aso Lulu na tea nei lea na faia ai le Fonotaga a Tusitala ma le Pulega a le Toaletai David Tua, faatasi ai foi ma le vaega o loo faalauiloaina fusuaga le Duco Events, mo le isi fusuaga lea e sosoo ai i le tausaga nei.
O le aso 31, le aso mulimuli o le masina o Mati lea ua faailoaina mai o le a faataunuuina ai lea faamoemoe, ae o le itumalo o Aukilani Sisifo lea o le a faia ai lea fusuaga, o le alii Nigeria o Ahununya poo Friday 13 lea o le a iloilo ma Tua i lana fusuaga ae ua lipotia mai, o le a fusu ai foi ma le alii Ausetalia o Mandine lea e lei faiaina lava talu ona fusu.
O se tala fiafia lea mo Aukilani ona o le fusuaga talu ai lea na fai si mamao o le malaga i Hamilton lea na faia ai.
O le alii Nigeria lea o Friday 13 lea foi na ia faatoilaloina Shane Cameron, ma o le uluai faiaina foi lea a Cameron i laufanua o Niu Sila nei i le 2007.
Manatua foi o loo tumau pea le miti a Tua ina ia iai se taimi ma se taeao e sii ai i le Fusi o le Lalolagi, ia ae tatou talosia ia lona faamoemoe fai toatasi ina ia taunuu ma faamanuiaina.
O le alii uli foi lenei o Friday 13 e lei faiaina lava, ae e 13 foi ana manumalo i le tui oti.
O se taimi muamua lenei o le a vaaia ai le alii Ausetalia o Anthony Mundine i laufanua o Niu Sila, o se tasi o alii iloga i lenei foi vaitau aemaise e lei mafai lava e se tasi ona faatoilalo lenei alii talu ona sui lana taaloga i le fusu mai le lakapi liki sa iai.
O le fale taalo faavaomalo i Aukilani Sisifo lea o le a faia ai nei fusuaga, le Trust Stadium i Waitakere City, sa fusu muamua ai foi Tua i le fale taalo lenei i le 2007 ma manumalo ai, ma o le fale foi lenei sa faia ai le Taamilosaga o le Ipu o le Lalolagi i le taaloga Netipolo a tamaitai lea na fetagisi ai le Silver Fern ina ua vali faalelei e Ausetalia i le 2008.
O le maea ai o le fusuaga talu ai o le Seneturi ma Cameron, na manatu ai le toatele ai o le a sosoo le isi fusuaga a Toaletai i Amerika ma faaauau ai lona toe foi mai i le maea talu le lua tausaga. Peitai o le feagaiga ma le Maori TV lea e tatau ai ona toe faia nisi fusuaga poo se fusuaga foi ina ia faamalie ai lea foi feagaiga.
O le susuga ia Toaletai David Tua ua faatulagaina nei i lana au paga i le numera tolu i le lalolagi atoa, ma o se tulaga maualuga lea ma lelei pe a faatusa i le lua o tausaga talu ona tau saili se paga. Afai ae faamanuiaina le faamoemoe lea i le aso 31 o Mati, o lona uiga ua vave ona toe oo le alo o Samoa i le luiina o le Siamupini o le Lalolagi.