Ua toe nei o se aga faamanatu le Sisigafu‘a a si o tatou atunuu e soo se Samoa i le lalolagi, ma ua sauni foi Sini Ausetalia mo lea faamoemoe.
Sa fono le mamalu o le atunuu ma le Komiti Faafoe faapea le afioga i le Konesula Tofa Manogiamanu Fonoti Etuale Ioane e toe faamautu le polokalame e amata i le sauniga lotu i le Aso Sa 1 Iuni 2014, ua siitia nei i le Whitlam Centre, Liverpool.
O le vaiaso talu ai na toe logo mai ai e le Ekalesia Aso Fitu i Minto ua lē avanoa lo latou Hall sa faia ai sauniga lotu i tausaga ua mavae talu ai galuega faaleleia o loo faagasolo (renovations). E ui o le puupuu o le taimi ae na toe sailia ma maua ai loa le Whitlam Centre mo le sauniga lotu lea ua sauni mai ai le Ekalesia Assembly of God a Niu Sa Uelese e faafoeina le faigalotu o lenei tausaga.
O le Aso Toonai, 7 o Iuni 2014 i le itula fitu i le afiafi o le a faafoeina ai le Siva Faapitoa o le Tutoatasi (Independence Ball) i le Macquarie Function Centre i Liverpool.
E pei ona faalauiloaina talu mai Fepuari, o le taimi muamua lenei o le a lē talia ai pepa e totogi i le ulufale atu i le faitotoa i lea po. E na o le fā selau (400) pepa ua uma ona tufaina atu ma totogiina ae lei oo i le aso o le faamoemoe. Ua na o latou nei o le a afifio atu i totonu mo lea faamoemoe.
O lenei faiga fou ia leai ai se fenumiai o nofoa o i latou ua leva ona totogi a latou ulufale ae faatoa o atu nisi i lea po i le faitotoa ma fao ai o latou nofoa ma laulau. E $80 le tau o le pepa e tasi e aofia ai taumafa e lima (5 course) ae saoloto le taumafaina o le uaina, pia ma vaisuamalie, kofe ma le ti.
O le faaili mālie a le EXODUS mai Sini lea ua sauni mai e faafiafia faatasi ai ma le tama pese iloga mai Samoa le Afioga ia Toala Eteru ua lauiloa i le Evaeva ma nisi faaili iloga.
O le a toe pese foi o ia i aso o Faafiafiaga ma aganuu lea e faia i le Aso Gafua, 9 o Iuni i le Whitlam Centre i Liverpool.
