“Ua ou mautinoa ua ia te au aseta o le taua, ou te le faiaina, ua ou matua fiafia o le a toe feaveai o’u lima”, o le lafoga lea a le alii fusu tino maualuga o Shane Cameron na ia faalauiloa ane i le au tusitala a le Waikato Times, a o iai i ana toleniga faasauni mo le fusuaga o le senituri ma le alo o le atunuu, David Tua e faataunuuina lea i Hemilitone i le aso 3 Oketopa, 2009.
Na taua foi e Cameron o lona lima taumatau lea na gau ina ua maea le la fetauiga ma le Amerika o Robert Davis i Gisborne i le masina o Mati, na mafua ai ona tolopo le la fusuaga ma Tua ia Iuni, ae ua maea nei ona siaki e oo lava i musele uma o ona ponaivi na manua lea ua toe foi i le lelei i le fa masina na feagai ai ma togafitiga. Ua faatalitali Cameron ina oo maia le aso tuupoina lea ua mamanuina o le “Fusuaga o le Senituri”, e le toe tupu i se isi selau tausaga, ua nofo faatali i ai le atunuu, o le tapuaiga a Samoa ae maise le lalolagi atoa.
O le alii lauiloa, Colonel Bob Sheridan o Las Vegas, o le a faafoeina le fusuaga (commentator), Temuera Morrison (Once were Warriors), o le fofoga o le po poo le MC, ae o le tamaitai pese lauiloa Bonnie Pointer (Pointer Sisters) lea na pese i le Rumble in the Jungle i le fusuaga i le va o Foreman ma Muhammad Ali 1974, o le a faafiafia mo le au maimoa i lea po. O loo umia pea e Tua (joint) le siamupini o le lalolagi i le tele o so’a poo tu’i kilivaina i totonu o fusuaga faapaga mamafa o le lalolagi, ae o loo tulaga 48 i le talaaga faalelalolagi i le malosi matautia o lana tu’i poo le so’a e uma ai lava mafaufauga faivavale o le tagata.
E 4,800 pepa o nofoa mo tagata lautele ua maea ona faatauina, ae o loo totoe pea le 800 o nofoa faaavanoa i le tau e $399 i le nofoa. Talosia le faamoemoe ia faataunuu i le manuia i le va o Tavita ma Koliata, ae manatua foi e lima lava nai maa faatauvaa na aumai i le alia, o nai maa foi ia e finau ai le taaloga.
