O le a lē faapito manū ia tasi i le finagalo tautua o Richard mo ona tagata i si o latou aai i Melepone, o le aai e tele ma e vavamamao le tele o pitonuu o alala ma papaaao ai ona tagata.
O lea ua faataoto ai ana faafiafiaga e lua i le Aso Toonai, aso 3 o Me i le pitonuu o Preston, ma le Aso Toonai aso 10 o Me i le pitonuu o Noble Park, ina ia maua uma e le mamalu ma le paia avanoa e sila maimoa ai i lana taleni.
O le a faafiafia faatasi ai ma nisi o faili lauiloa le Mt Fao Band, Different Colour Band, faapea nisi o aufaafiafia, ma le taleni lauiloa a Tony da Rapper. Ua nofo sauni le paia lautele mo nai avanoa e emo faalausosoo ai mea pueata mo facebook, aemaise lava le aso 10 auā e sosoo ma le Aso o Tina.
E talitonu o le a toatele tamā o le a ave i ai tautoga e faatafao ma saasaa a o faatagitagi le leo mālū o Richard i le pese ia Fetu.
