O le alii Samoa o Tito Schmidt o le kamupani a le Lavashe Couture ma le tamaitai faipisinis ia Oketi Taulaga o le Moatoga ua sauni atu nei mo se faaaliga o laei suifefiloi. O le faamoemoe mo le faaiuga o le vaiaso nei ua tapena mo tamaitai lalelei o Samoa, Pasefika, Asia ma Ausetalia (models).
O mamanu o laei faapolenisia eseese e faaalia i lea po o le a maimoa ai Sini nei i le maualuga o le tomai ua oo i ai fanau a Samoa o loo soifua i Atunnu tetele e pei o Ausetalia.
O le ulutala o lenei afiafi o le ‘Faafofoga, Maimoa, Molimau ma Sapai’ (Hear, See, Witness, Embrace).
Faaalia e Oketi taulaga i luga o le leitio Samoa i Sini o le aogā o lea faaliga ia faaoso manatu ai i fanau talavou le fiafia e siva ma gaosi laei Samoa ma le Pasefika mo le Maketi lautele.
O le susuga a Tito Schmidt ua loa lana tautua i Sini ma Ausetalia i lana ausiva ma le tapenaina o ofu ma togiga faaleaganuu (designing).
O le po foi lea o le a vaai ai i nisi o tamaitai faapolofesa i Sini i mea nei o faailoa laei. O se vaega o le seleni e maua i lea faamoemoe e faimeaalofa atu ai i le Falemai o tamaiti i Westmead.
O nisi o mamanu iloga o le a maimoaina e aofia ai ata o manufelelei, figota ma i‘a eseese o le sami. O se ituaiga tauvaga lenei ua loa i Samoa ma Niu Sila ae peitai o loo tau faaofi pea i le maketi a Sini. O le siapo foi o le a tele ni teuga o le a faailoaina ai i lenei faamoemoe.
I lenei talutalu fou ua avea ma faamalosiau auā ua toe amanaia e tupulaga fou nei mamanu Faasamoa ma Polenisia e faailoa ai lo latou mitamitaga i lo latou faasinomaga.
O le luasefulu tausaga talu ai na matuā faigata ai nei taumafaiga auā sa lē malosi le unaia o tauvaga faapenei.
