O le taimi muamua lenei o le a auina atu ai ni atigipusa seevae (shoebox) e faatumu i meaalofa o le Kerisimasi ma api, peni aoga i le fesoasoani a le Samaritan Purse mo Samoa. O le tautua faifai pea a le vaega o le Servolution lea e ofoina atu e aunoa ma se taui le tapenaina o tuamaota, togalaau ma nofoaga faitele na mafua ai lenei fesoasoani moomia e fanau talavou i Samoa.
Na saunoa Pastor Viliamu Aufai ma le faletua ia Josie o le Gracepoint Community Church i Fairfield, e na o Atunuu tau atiae i Asia ma le Pasefika e aofia ai Fiti na auina i ai nei pusa Seevae faamealofa. Ae peitai o la latou talosaga auā le faasafua atu mo tupulaga Samoa, ua sauni atu ai nei pusa e 10,000 mo le tufatufaina atu i le vaitau o Aso Fiafia.
“O le agaga o lenei atigipusa seevae ua faatumuina i meaalofa ma api, penitala, titina sukalati, lole ma meataalo, ina ia maua ai e fanau laiti o soifua i atunuu tau atiae nei meaalofa laiti e masani ona lē maua e i latou i Kerisimasi taitasi” o se saunoaga lea a le susuga i le Faafeagaiga.
O le vaitau tonu foi lea o le Agaga foai o le lalolagi Kerisiano i le Fanau mai o le Mesia. Pau meataalo e lē talia i totonu o nei atigipusa seevae o faatagata o fitafita tau, fana, taavale tau ma nisi meataalo e faamanatu ai taua ma fevaevaeaiga o loo feagai ai nisi o atunuu. Faalia e Pastor le talosaga foi o nisi o Aulotu ma tagata taitoatasi ma faalapotopotoga e fia fesoasoani ma faatumu nisi o Pusa seevae.
O le Aso Faraile ua mavae atu na toe fono ai le Komiti o loo taitaia e le susuga i le Tiakono ia Jason Chang ma Roberta i le HAll a le Gracepoint Church e mataitu fuafuaga mamao o lenei fesoasoani.
Ua mautu foi nisi o Ekalesia i Samoa e taunuu atu i ai nei atigipusa meaalofa mo le tufatufaina e pei o le Apia Protestant Church, Ps Faafetai Fata o le Harvest Centre ma Pastor Patolo ma le faletua ia Grace mai Laulii. O le susuga ia Hugo Betham o le Betham Brothers o loo lagolago malosi foi i le auina atu o nei atigipusa meaalofa.
Na saunoa foi Pastor Vili Aufai e faafetaia le lagolago a nisi o Ekalesia i lenei faamoemoe a le Samaritan Purse e pei o Ps Tom ma Carol Meredith o le One Community Church, Ps Opeta Tautalafaua o le Faith City Church, Rev Atepera Lee CCCJS, Ps Tana Paulo o le House of Praise, Ps Livalina Ah Hoe o le Centre of Hope, faapea ma Ps Ula ma Falasia Nanai o le Words of Life Church.
