O le tautua a faiaoga e lē mafai ona tatou natia i lalo le tāua tele auā o faiaoga na aoaoina tatou ma faafailele i potu aoga i mataupu o le poto salalau. Lenei ua tatou popoto ma malamalama ma maua galuega ma e tatau ai ona tatou manatua faiaoga uma i le latou tautua matavela ua afu, ae o loo faaauau pea auā o le ola aoaoina o se mea lelei.
O le sini o le faamoemoe o le Matagaluega o Aoga Taaloga ma Aganuu i lo tatou atunuu o loo tapena i ai, o le faaaliga poo se exhibition e faalauiloa ai le tautua a faiaoga mai le 1962 e oo mai i le 2012 ua atoa ai le limasefulu tausaga o le Tutoatasi.
O le a faatāua ma manatua ai foi faiaoga mai tua atu o le 1962 faasolo i tausaga o pulega faakolone a isi malo i Samoa aemaise lava le Malo o Niu Sila sa pulea lo tatou atunuu mo ni tausaga se tele.
O le masina fou o le a faamanatu ai le aso o faiaoga o le lalolagi, le World Teachers Day i le aso 5 o Oketopa, ma o le vaiaso atoa lea e faasolo ai ma polokalame o le limasefulu tausaga o le tautua faafaiaoga i lo tatou atunuu.
O tapenaga o feagai nei ma le matagaluega o le faamaopoopo o ata o nai faiaoga ma faamatalaga uma i le latou tautua, ona faalauiloa lea mo le silafia e le atunuu i le vaiaso o le a faatino ai le faamoemoe.
Faaalia e le tamaitai Pule sili o le Matagaluega o Aoga Taaloga ma Aganuu, le afioga Galumalemana Nuufou Petaia, o se aso e tatau ona lagona uma ai e faiaoga o loo galulue ma faiaoga ua malolo litaea le agaga o le fiafia ma le faafetai, ua aulia mai nei tausaga e tele o le latou tautua aemaise o le galuega e lē faigofie ona e tele faigata ma fita ma luitau.
O le faamoemoe o lea vaiaso faailogaina mo faiaoga, o le faia lea o ni faatasiga tetele mo faiaoga i Upolu faapea ma Savaii.
O le a fetufaai ai i mataupu e fesootai ma le galuega ina ia maua le sao o faiaoga e tufa atu ai sona silafia ma se iloa i isi faiaoga, e le gata o vaega e faaleleia ai le auaunaga ae o vaega e fofo ai ni faaletonu ma ni faafitauli.
O le itu mautinoa e lē ese le galuega faafaiaoga ma isi tomai faapitoa i le tele o faafitauli e feagai ai. E faitioina ma tele i ai faamatalaga pe a oo ina faaletonu le vaai ma se mātau a le atunuu.
Peitai na faaalia e le tamaitai pule sili o le matagaluega o faafitauli e tutupu pea e lē mafai ona natia ae ao lava ona faatāua le vaai i ai ma faia se fofo.
O loo manaomia faamatalaga uma o faiaoga sa galulue mai o latou alo ma fanau ma aiga e tuuina atu i le matagaluega, ina ia maua ai se aotelega lelei o le tapenaga o le a fai ma pine faamau o lea aso tele o faiaoga i Samoa.
