E ui ina aitau malele se tasi o matai faiupu o le tootoo o Lalogafuafua, ae ua lagona o lona taimi lenei e tausinio ai i le tofi faipule o lona itumalo.
O le palota tele a le atunuu i le tausaga e 2006, ma le palota laitiiti a Anoamaa i Sasae i le paeaiga o le 2001 i le 2006 ina ua faasee tuagalu le tofi faipule o le itumalo i lea vaitaimi ona ua tofia e avea ma sui o le Fono Sui Tofia, na faailoa ai e le tofa Manuo Failautusi lona manao e fia tauva i le tofi faipule o le itumalo.
“O le taimi lena ina ua see atu le afioga i le Tamaaiga e avea ma Sui Ao, na ave ai lo‘u manao ae tei ua aumai le fautuaga ou te tapuai ae lafo i le susuga Moefaauo, lea la ua ou faailoa i ai, o a‘u ou te fia tauva i le palota laitiiti o loo faatalitali le aso e faia ai”.
O le faamatalaga lea a Manuo ina ua maua se feiloaiga e faatalatalanoa ai e tusa o lona faamoemoe ua folasia.
Faaalia e lea tamalii, o se naunautaiga ua leva o mafaufau i ai ona o le fia tautua i upufai o le Malo ma le atiina a‘e o Anoamaa i Sasae.
O le tofa Manuo o se tasi sa galue i le Matagaluega o Leoleo ma Falepuipui mo le silia i le 20 tausaga, ae o le tausaga e 1992 na faamavae ai ma malaga loa i Niu Sila ma lona aiga mo sailiga manuia auā aiga nuu ma ekalesia i Samoa.
O le 28 tausaga talu ona nofomau i Niu Sila e lei tuua ai lona malaga mai pea i Samoa i faalavelave ma meafai a lona aiga aemaise o lona nuu o Lufilufi.
“O mea e fai i Niu Sila e malaga atu ai foi lo matou nuu ma le itumalo ma lo tatou Malo, e faaauau ai pea le tautua auā o a‘u o se matai ua ave i ai le faatuatuaga e feagai ma le tautuaina o nuu ma aiga”.
O le oo poo le momoli o le Ao Mamalu o le Malo a o avea ma Sui Ao na malaga mai ai i Samoa auā o ia e feagai ma le Tui Atua le afioga i le Tamaaiga. E faapea foi i le filifilia o le Tui Atua e avea ma Ao ina ua tuanai le tuumalo o le susuga i le Malietoa sa seei i le tofiga.
“O la‘u tautua lea e lē mafai ona tuua auā o a‘u e feagai ma le Tamaaiga, ma o le mafuaaga foi lea o le fia oo i le tofi faipule sa tautua ai foi le Tamaaiga aemaise o le fetalaiga ia Moefaauo Lufilufi”.
Ua faailoa e Manuo o loo galulue ana loia mo le faamautuina o lona tulaga agavaa e tauva ai i le ausia lea o le tolu tausaga poo le 240 aso e tatau ai ona nofomau i Samoa i le tausaga.
“O loo galulue a‘u loia ae ou te iloa e iai le avanoa mo a‘u”. Tasi lea aiaiga o loo talosagaina ai e lea matai o loo faamautu i fafo se finagalo o le Palemia ma le faigamalo, auā ua faailoa e Manuo o le a tauva mo le HRPP, ina ia toe sosoo ma le tofa Moefaauo sa avea ma faipule o Anoamaa i Sasae i le paeaiga ua mavae a le Palemene mo le HRPP.
O le lagolagoina e Manuo o le itu faaupufai o loo avea ma faigamalo e lē o tuua ai lona lagolago foi i le Tautua Samoa.
“O a‘u ou te lagolago i soo se vaega faaupufai auā a malaga atu i Niu Sila mo suegatupe e lē tuua la‘u lagolago”.
O le Itu Agai ua iai nei o se itu ua matuā malosi lava, ma o la‘u mātau e avea ma se faigamalo sili ona malosi i le lumanai”, na saunoa ai Manuo.
O loo talosia e lea sui tauva e toe liuliu se finagalo o le Malo ma suia aiaiga o iai nei i le monotaga ma le 3 tausaga e nofomau ai i Samoa, ina ia aveese nisi noanoataga ae faafaigofie le tulaga agavaa mo matai Samoa o aumau ma nonofo i fafo e tauva ai i tofi o itumalo i le Palemene. “O la‘u tatalo lea i le alii Palemia ma le faigamalo”.
