O se fiafiaga tele mo le mamalu o tagata lautele, ina ua tulata nei i siui, le faamaeaina o le galuega tele sa tapenaina ma faamausali, le nofoaga mo fetaulaiga o femalagaiga i nofoaafi (train station) i le aai o Manukau.
O lea galuega tele, o se vaega o fuafuaga a le Pulenuu ma le Matagaluega o Felauaiga o le Aai Malosi o Aukilani (Super City). O le taimi muamua lenei i totonu o se vaitaimi umi e silia ma le 80 tausaga i talafaasolopioto o Aukilani lava ia, ua afea ai ma taunuu le auaunaga a nofoaafi mo Manukau.
E le gata o se fiafiaga mo tagata lautele femalagai o le aai, ae ua sili atu foi mo faiga faatosina i tagata maimoa mai fafo ma le tulaga o pisinisi.
Ae na faailoa foi le agaga faafetai ma le fiafia tele o le alii Pulenuu o le Aai Malosi, le susuga ia Len Brown, ona ua vavala mai ata o le tino o lea foi fuafuaga mamao mo le manuia o tagata Aukilani.
O le aso 4 o Aperila, o le vaiaso na tea nei, na faia ai se sauniga aloaia mo le faalauiloaina a o agai atu mo le aso tele o le a tatala ai ma faia se sauniga faapitoa mo tagata lautele, i le aso 14 o Aperila lava o le tausaga nei.
O se malaga faapitoa a le nofoaafi sa tuua le nofoaga autu i Britomart i le ogatotonu o le taulaga i Aukilani agai i Manukau sa malaga ai le alii Pulenuu faatasi ma nisi o le pulega o le aai malosi, faapea ai ma sui o le Matagaluega o Taavale ma Felauaiga. O se vaega o le faamanatuina o le galuega tele ina ua toe o sina taimi puupuu, ona tatalaina loa lea.
O le faamoemoe lava o le alii Pulenuu ma le faauluuluga o le Matagaluega o Taavaleafi ma Felauaiga i Auklani, ia le gata ina faafaigofieina auala mo le felauaiga o tagata lautele, ae o le a fesoasoani tele foi, i le atinaeina o le aai i lona tamaoaiga, atoa ai ma le aveesea o le soona pisi ma le poloka o auala tele i aso taitasi i soo se vaega i totonu o le aai.
O le Aso Toonai, aso 14 o Aperila mai le 11.30 i le taeao e oo atu i le 2 i le aoauli ua fuafua mo le sauniga faapitoa e tatala aloaia ai le galuega ma le nofoaga i Manukau. Ae o le Aso Sa e sosoo ai, aso 15, o le a amata ai femalagaiga a nofoaafi ma sosoli ai le auala ma lona nofoaga i Manukau lava.
O se faamatalaga sa faamatuuina mai e le pulega o le kamupani a le Maxx, o loo latou faatamoeina le tulaga o femalagaiga a nofoaafi ma pasi i lalo o le faamalu a le Pulega Faaitumalo a Aukilani. Sa latou taua ai e faapea, o loo maualauga le talitonuga, o se tasi lenei o malaga i aso uma, o le a matua sili atu ona pisi, nai lo isi malaga agai i isi itu o le aai.
O loo iai foi le fuafuaga, o le a amata i se nofoaafi e lua pe tolu foi ona potu toso, o se vaega faataitai ma vaavaai ai le fuainumera o tagata femalagai i le va o Aukilani ma Manukau. Afai o le a faamaonia le pisi ma le toatele o tagata e faaaogaina malaga i le va e pei ona taua, o le a le fesiligia le toe faaopoopoina i le fa poo le lima foi o potu toso mo nofoaafi i malaga taitasi.
O le nofoaga fou o le a tatalaina nei i Manukau, ua mae‘a ona faatulagaina ai ni mea pueata CCTV, ma fausia foi i ona foliga ma vaaiga faaonaponei. O loo taua foi i le saunoaga a le Pulenuu, Len Brown e faapea, o le a matua siitia le tulaga matagofie ma le itu o pisinisi mo le manuia o tagata lautele, ona o le galuega tele o le a umusaina.
O le taimi nei e 580 pasi mai itumalo eseese o Aukilani agai i Manukau o loo tautuaina le mamalu o tagata femalagai o le aai i aso uma.
O le faaopoopo ane i ai ma malaga a nofoaafi i le masina nei lava, o se tulaga o le a matua atili lolofi ai ma le toatele o i latou o le a agai i Mankau mo faatauga, tafaoga ma feau eseese, aemaise o asiasiga i aiga ma uo.