Ua tatou oo mai i le toe masina o lenei tausaga. Ua faitau vaiaso ona tuaao lea i le vaiaso o loo faapea ona taupati ma tulimatai e le lalolagi ua faaigoaina o le Kerisimasi. O le vaitau o loo faapea ona faatāuaina e le aukerisiano auā o le vaitau sa faapea ona soifua mai ai Iesu Keriso o le Faaola o le lalolagi uma.
O le vaitau e manatua ai pea le alofa faatino o le Atua Soifua i le tagata o le palealii o Ana galuega mamana. O le vaitau e faailogaina ai le aso na soifua mai ai le Pepe ua faaigoaina o le Emanuelu, o lē na ia faasaolotoina le tagata mai le filifili ma le lavelave o le agasala. O nisi ia o vaega e manatua ai lenei aso, peitai ua tauau ina mou atu le agaga o le Kerisimasi.
Ua tele ina faatāua lenei vaitau o se vaitau o fiafiaga faalelalolagi e pei o faiga pati ma inugaava. Ua faatāuaina e le lalolagi o se vaitau o fefaatauaiga o oloa e pei o le tu ma le aga o tagata faipisinisi ma le aumaumea. Ua faailogaina e nisi o se vaitau e fai ai faigamalaga mo tafaoga ma evaga mai lea atunuu i lea atunuu, pe mai lea afioaga i lea foi afioaga.
O le fatu poo le agaga moni a le susuga i le faafeagaiga ia Rev Victor Pouesi ma le Faletua aemaise o le Ekalesia Faapotopotoga Kerisiano Samoa i Magele Sasa‘e, o le toe fafagu ma le faaolaola mai lea o le aano ma le autū moni o le aso Kerisimasi. O le mafuaaga lea na faavae ai le 13 Aso o le Kerisimasi e pei ona amata mai i le tolu tausaga talu ai.
O se polokalame sa fanau mai i le loto ua ifo ma toele i le Atua ma Lona Finagalo ina ia faaauauina le faatāuaina o le faatalaleleiina o agaga mo le Faaolataga. O le fesili e faatalaleleiina faapefea? O se polokalame ua tuufaatasia e lagi ai pesepesega ma viiviiga o le Kerisimasi. O fatuga e momoli mai ai le feau o le faaolataga. O loo afifi mai ai foi ma le feau o le ola toefuataina.
O loo faapea foi ona aumai ai ma le feau o le faamalologa. Faamalolo mai ma‘i o le tino ma le mafaufau. Malolo mai faigata ma tiga o puapuaga masani o le ola nei ina ua feluitauina le soifua matua ma le malosi ua pulapula lagoto. Faamalolo mai faafitauli alia‘e i totonu o aiga i taimi uma ma aso taitasi. O se faamoemoe ua lava tapena auā taualumaga o lenei tausaga 2012. E ui ina o lea e lei amataina, ae ua taoto ataata o tauleleia ina ua uma ona saunia mea uma auā le Aso 9 o Tesema o le Aso Sa nei, lea ua iai le faamoemoega o le a amatalia ai.
I se feiloaiga ma le susuga ia Rev Victor Pouesi na ia faailoa ai lona agaga faafetai pea i le Atua ona o lenei ua tino mai lava le fatu sa totō i le tausaga 2009. Sa fui ma faasūsū, ae tuu atu i le Alii i talosaga ina ia fesoasoani mai. Na ia faailoa foi lona agaga faafetai i nisi o kamupani o loo faapea ona ofoina atu le latou lagolago e pei o le kamupani lafotupe o le Pacific Ezy Money Transfer atoa ai ma le Samoa Multimedia Group lea o loo faatautaia le Radio Samoa ma le Samoa Times.
Na ia faafetaia foi le paia maualuga i tupu ma tamalii, o faletua ma tausi ma le maave eseese o le ekalesia EFKS i Magele Sasa‘e ona e pei e pa‘ū lava mamafa o le laau ia te i latou. O tapenaga i itu tau taumafa, o le tapenaina o le malumalu o loo faataunuuina ai le faamoemoe atoa ai ma le faatupeina o nisi o vaega o loo moomia auā le faaleleia atili o le faamoemoe.
Na saunoa Rev Pouesi, o le mea tāua ia mae‘a ane le 13 Aso o le Kerisimasi o iai se agaga o loo ua faapea ona aiaina i lenei polokalame. O loo iai le faamoemoe o le a faapea ona pueina polokalame uma i lenei tausaga ma faatau atu i DVD, o se vaega tupe o le a faapea ona maua mai ai o le a fesoasoani malosi lea mo tapenaga auā le faasauni atu i le 13 Aso o le tausaga fou.
O se tasi foi o fuafuaga o le a faapea ona tilotilo i ai le Komiti Faafoe ma le ekalesia, o le pueina lea o DVD ma tuuina atu ni kopi i nai tuaa o loo faataotolia i aai o tagata matutua, aemaise ai foi i latou o loo iai i toese auā le tuliina o a latou faasalaga.
O nisi nei o tagata o loo faapea ona fiafia i lenei polokalame e pei ona maimoa ai i luga o televise i tausaga ua tuanai, peitai talu ai ona o nisi o suiga ua iai tulaga tau faasalalauga i luga o televise, ua lē mafai ai ona faaauauina lea auaunaga, ae o lea o le a suia lea i le pueina i DVD ma faaoo atu i nei nofoaga.
O le polokalame o lenei tausaga o le a faapea lea ona tatalaina i pesepesega a le Ekalesia EFKS mai le afioaga i Vaiala, o loo taitaia mai e le susuga i le faafeagaiga ia Lotu Uele ma lona faletua. O le a faapea foi ona auai mai ai le tele o isi foi o ekalesia eseese i totonu o Niu Sila nei. O le tausaga foi lenei o le a pepese ai se aufaipese AOG mo se taimi muamua i lenei polokalame, ma o se itu na faaalia ai e le susuga ia Rev Pouesi lona agaga fiafia.
O se tasi o ana saunoaga na ia ta‘ua ai, poo ā lava igoa o Ekalesia, o le autū moni o le Agaga o le Kerisimasi, ma e tasi lava le feau e faatāuaina o Iesu o le pepe o le Faaolataga. O le polokalame atoa o le 13 Aso o le Kerisimasi lea o loo lomia atu mo le silafia e le atunuu o ekalesia o le a faapea ona auai, o aso ma taimi o le a pepese ai.