Ua sauni atu nei le itumalo o Lower Hutt i Ueligitone mo se latou Taamilosaga Kirikiti faa-Samoa moni, e pei ona faagasolo ai a latou faasilasilaga mo soo se ‘au e fia faapipii atu e auai i lenei tausinioga. O se fiafiaga sili lea ma faafetaia ai foi e Susuga i Toeaiina, Susuga i faafeagaiga tupu ma tamalii o Samoa o loo latou tapenaina lenei faamoemoe, ina ua a‘e se tofa i le Ofisa faaitumalo i Lower Hutt, (LHCC) e lagolagoina lenei faamoemoe, ina ia faaaogā lelei ai taleni a le toatele o alo o Samoa i lea foi faagatama.
Ae pei ona faaalia i le autu o loo faalauiloa ai lenei faamoemoe “Taamilosaga Kirikiti Faa-Samoa Moni”, o le auga autu lea o lenei tapenaga, ina ia taumafai e faaolaola pea le kirikiti faa-Samoa moni, e le gata i le faatinoga, ae o tulafono foi o lenei taaloga e pei ona masani mai ai i Samoa.
E ui o le taamilosaga kirikiti faa-Samoa, peitai o loo faasafua atu avanoa e mafai ai ona auai mai ni ‘au a isi o latou uso tuaoi, e iai Fiti, Toga, Vanuatu, Rarotoga, Maori, Papalagi, Initia ma isi lava tagatanuu i totonu lava o lo latou itumalo, faapea foi ma le loaloa o le Laumua i Ueligitone.
Ta‘ua i se pepa o faamatalaga mai se tasi o sui o le komiti o loo tapenaina lenei faamoemoe, o le finagalo o le HCC ina ia amata ma ia lē toe motusia lenei taamilosaga, ae ia avea o se tasi o faamoemoe o le a faia faaletausaga.
Ua faasalalau nei la avanoa mo le lesitalaina o ‘au e fia auai i le taamilosaga kirikiti lenei faa-Samoa moni i le aai o Lower Hutt.
Mo le uluai taamilosaga i le tausaga nei, e 24 ‘au a alii o loo faamoemoe e amata ai, e taitoa 20 i le ‘au. Mo le itupa a tamaitai, e 12 ‘au ua fuafuaina mo latou, e taitoa 12 i le ‘au.
O le fua lea ua faatulaga mo lenei tausaga, ae ono toe iai nisi suiga mo ni faaleleiga atili a o faagasolo le taamilosaga auā le toe faasauni ai mo isi taamilosaga i le lumanai.
O loo iai telefoni e faafesootai ai le komiti mo nisi faamatalaga atili o lenei taamilosaga, a le mamalu o le atunuu o loo alala i lea foi faaitu i Ueligitone:
021 477 972 , 021 266 7310,
021 100 0670, poo le imeli:
wce.samkilikiti@hotmail.com
